Жил бүрийн 10-р сарын эхний Даваа гаригт тэмдэглэн өнгөрүүлдэг Дэлхийн Архитектурын өдөр энэ онд Архитектур, Барилга, Уур амьсгал гэсэн сэдвийг онцолж байна. 1.3 сая гаруй архитекторыг төлөөлдөг Олон Улсын Архитекторуудын эвлэл нь 2015 оны 10-р сарын 5-ны өдөр буюу өнөөдөр энэхүү тэмдэглэлт өдрийн сэдвийг ийнхүү зарласан.

     Дэлхийн улс орнуудын засгийн газрууд энэ оны сүүлчээр Парис хотноо зохион байгуулагдах “COP 21” уур амьсгалын олон улсын уулзалттай холбогдуулан Олон Улсын Архитекторуудын эвлэл бүс нутгийн архитектурын байгууллагуудтай хамтран, хүлэмжийн хийн ялгаруулалтыг бууруулахад архитектур, дизайн, хот төлөвлөлтийн гүйцэтгэх үүргийг онцлон анхаарч ажиллахаар болсон юм.

     Олон улсын архитекторуудын эвлэлийн гишүүд, боловсон хүчин, түнш хамтрагчид манай цаг үеийн дэлхийн уур амьсгалын өөрчлөлттэй уялдуулан бүтээн байгуулалтын ажлыг өрнүүлэх талаар энэ өдөр зөвлөлдөж байна.

     Хариуцлагатай хот төлөвлөлт, барилга, дизайныг хөгжүүлэх зөвлөгөөн, цуврал арга хэмжээг зохион байгуулахаар төлөвлөж буй Олон Улсын Архитекторуудын эвлэлийн зүгээс Парис хотноо 2015 оны 11-р сарын 30-наас 12-р сарын 15 хүртэл үргэлжлэх “COP 21” уулзалтанд дэлхийн архитекторуудын оруулах хувь нэмэр, оролцоо чухал гэдгийг онцлон тэмдэглэжээ.

     1956 онд байгуулагдсан Монголын Архитекторуудын эвлэл нь өдгөө өөрийн орны архитекторуудын эрх ашгийг хамгаалах, үйл ажиллагааг нь дэмжих, тэдний бүтээлийг олон улсад сурталчлах үүднээс аливаа үзэсгэлэн, хэлэлцүүлэг, зөвлөгөөн зэрэг арга хэмжээг зохион байгуулахын зэрэгцээ олон улсын хэмжээний аливаа үйл ажиллагаанд идэвхтэй оролцсоор ирсэн төрийн бус байгууллага юм. Манай улсад дотоод болон гадаадын их, дээд сургуулиудыг дүүргэсэн чадварлаг архитекторууд цөөнгүй байдгаас Дэлхийн архитектурын өдрийг жил бүр тэмдэглэн, тодорхой арга хэмжээг зохион байгуулдаг.

     Дэлхийн архитектурын өдрийн мэндийг Монголын нийт архитекторууддаа дэвшүүлье.