Манай Улс энэ жилээс өвөл, зуны цагийн шилжилт хийдэг болсон. Үүний дагуу өнгөрсөн дөрөвдүгээр сард зуны хуваарьт шилжсэн. Харин өнөөдөр өвлийн цагийн хуваарьт шилжиж байгаатай холбогдуулан Стандартчилал хэмжил зүйн газраас хэвлэлийн хурал хийлээ. Уг хуралд тус газрын мэргэжилтнүүд болон үүрэн утасны компаниудын мэргэжилтнүүд оролцсон юм.

Өнөөдөр шөнө буюу Баасан гарагаас Бямба гарагт шилжих шөнийн 00:00 цагт цагийн зүүг нэг цагаар ухрааж өвлийн хуваарьт шилжих юм. Таны компьютерын үйлдлийн систем (Windows, Mac) сүүлийн шинэчлэлтээ хийсэн бол автоматаар шилжинэ. Мөн iPhone, iPad төхөөрөмжүүд iOS системийн 8.4 хувилбар ба түүнээс хойшх хувилбартай бол автоматаар шилжинэ.

Харин Android төхөөрөмжүүдийн хувьд үйлдвэрлэгч бүр, загвар бүр ялгаатай байгаа ба үйлдлийн системийн update нь сүүлийн 4 сарын дотор шинээр гарсан бол төхөөрөмжүүд энэ өөрчлөлтийг нэвтрүүлсэн байх магадлалтай. Бусад тохиолдолд өөрсдөө цагаа ухраах аж.