Нийслэл хотод барилгын бүх төрлийн материалыг нэг дороос авах боломжтой хамгийн том худалдааны төв үүд хаалгаа нээлээ. Ингэснээр худалдан авагчид олон төрлийн материал авах гэж ийш тийш явж, цаг мөнгөө гарздах хэрэггүй болж байгаа юм. 15 мянган ам метр ашигтай талбай бүхий энэхүү “BIG” худалдааны төвийн албан ёсны нээлтийн ажиллагаанд Нийслэлийн ерөнхий менежер бөгөөд Захирагчийн ажлын албаны дарга Б.Бадрал, Баянгол дүүргийн Засаг Дарга, НИТХ-ын төлөөлөгч Д.Оросоо болон албаны бусад хүмүүс оролцсон юм.

     Олон улсын барилгын худалдааны төвүүдийн жишигт нийцүүлэн, бүх төрлийн бараа бүтээгдэхүүнийг ангилан төрөлжүүлж, тохилог орчныг бүрдүүлэн хэрэглэгч, худалдан авагчдын тав тух, хэрэгцээ шаардлагыг бүрэн хангах нөхцлийг бүрдүүлсэн “BIG” төвд худалдаа, үйлчилгээний зориулалттай талбайгаас гадна 2000 ам метр бүхий агуулах, 1000 ам метр гадаа талбай байгаа. Түүнчлэн түрээслэгч болог худалдан авагчдын таатай нөхцлийг хангах үүднээс 200 орчим автомашины зогсоолыг байгуулжээ.

   Харуул хамгаалалтын нэгдсэн системд холбогдсон 30 камераар байгууламжийн гадна, дотно талбайг 7 хоногийн 24 цагаар хянаж, аюулгүй байдлыг ханган ажиллаж байна. Тус худалдааны төвийг байгуулснаар 400 гаруй ажлын байрыг шинээр бий болгосон нь нийгмийн хариуцлагаа хүлээж, улс орондоо зохих хэмжээний хувь нэмрээ оруулж байгаа хэрэг юм.

     Хотын хамгийн том барилгын материалын “BIG” худалдааны төв нь Гурвалжингийн гүүрний орчимд байрладаг учир хэрэглэгч та олон захаар явж, цаг заваа дэмий үрэх хэрэггүй болж байна.