Дэлхийн дотоодын нийт бүтээгдэхүүний 10 хувийг барилгын салбар бүрдүүлж, хүлэмжийн хийн 23 хувийг ялгаруулдаг. Тиймээс "Ногоон Барилга" байгууламжийн тухай асуудал идэвхтэй яригдаж, манай улсад ч бас энэ чиглэлээр төсөл, хөтөлбөрүүд хэрэгжиж  эхлээд байна.

     Хууль, эрх зүйн хүрээнд Монгол Улс "Ногоон барилга" гэдгийг дулааны алдагдал хамгийн бага байх хийцтэй, халаалтын шийдэл нь агаарт ялгаруулах бохирдол багатай, эрчим хүчний хэмнэлттэй, хур тунадасны усыг хуримтлуулж ашиглах, хаягдал бохир усаа цэвэрлэж зайлуулах технологи бүхий барилга, байгууламж байна гэж тодорхойлсон.

     Өнгөрсөн онд УИХ-аар батлагдсан Ногоон хөгжлийн бодлогод барилгын дулааны алдагдал 50 хувьтай байгааг таван жилийн дараа 20 хувь, 2030 он гэхэд 40 хувиар бууруулахаар тусгасан аж. Энэ хүрээнд эхний ээлжинд улсын төсвийн хөрөнгө оруулалтаар баригдах сургууль, цэцэрлэгийн барилгыг "Ногоон Барилга" болгохоор зураг төсөл боловсруулах ажил хийгдэж эхэлсэн.

    Энэхүү асуудлаар БОНХАЖЯ болон аж ахуйн нэгж, байгууллагуудаас хэрэгжүүлсэн төсөл хөтөлбөр, цаашид хийх ажлын төлөвлөгөө болон үр дүнгийн талаар тус яамны Ногоон хөгжлийн бодлого, стратеги төлөвлөлтийн газрын ахлах мэргэжилтэн Ц.Төмөрбаатараас тодруулга авлаа.

     Манай яамнаас "Ногоон хөгжлийн бодлого" 2014 оны 6 дугаар сард батлагдсан. Энэ нь Монгол Улсын тогтвортой хөгжилд хүрэх Ногоон хөгжлийн загварын нэг арга зам юм. Үүнд ногоон эдийн засаг, ногоон барилга, ногоон худалдан авалтыг бий болгох, хөгжүүлэх зэрэг олон зүйл хамрагдана.

     Ногоон барилгыг хөгжүүлэх, ногоон барилгын чиглэлээр олон улсын дэмжлэг, туслалцааг авах багагүй ажил хийгдэж байна. Тухайлбал, НҮБ-ын 5 салбар байгууллагын хамтарсан “Ногоон Эдийн Засгийн Төлөөх Түншлэл” хэмээх хөтөлбөрт санамж бичиг үзэглэж, ногоон барилгыг Монгол Улсад анхлан хөгжүүлэхээр ажил гүйцэтгэж байна. Ер нь 2015 оноос эхлэн ногоон барилгын зураг төслийг боловсруулах ажлыг идэвхжүүлээд явж байгаа. Манай улсад 17000 гаруй хүүхдийн сургууль хэрэгцээтэй байгаа учраас эхний шатанд Сургуулийн Ногоон барилгыг барихаар сонгосон. Одоогийн байдлаар Нийслэлийн Засаг захиргааны байгууллагаас Сонгинохайрхан дүүргийн 25-р хороо буюу Тахилтын аманд байрлах газрыг төлөвлөсөн. Сургуулийн барилгын зураг төсөл боловсруулах тендер зарлагдсан. 2017 онд уг барилгын ажлыг эхлүүлэхээр зорин ажиллаж байна.