Барилгын салбарын анхны эмэгтэй сайд гэдгээрээ нэг хэсэг олны анхаарлын төвд байсан Барилга, хот байгуулалтын сайд З.Баянсэлэнгэ өнөөдөр “Сайдын 100 өдөр” нээлттэй өдөрлөгийг зохион байгуулж, хийж гүйцэтгэсэн болоод цаашид хийхээр төлөвлөсөн ажлуудаа танилцуулсан юм.

     Салбарын төрийн болон төрийн бус байгууллагуудын төлөөллүүд оролцсон уг арга хэмжээний үеэр З.Баянсэлэнгэ сайд үг хэлж, илтгэл тавьсан бөгөөд Урлаг спорт, хөдөлмөр бүтээлийн аяны туг шилжүүлэх ажиллагаа болж, БХБЯ ипотекийн зээлийн урьдчилгаа 10 хувийн санамж бичиг байгуулах гэрээнд Голомт банктай хамтран гарын үсэг зурлаа.

     Өнгөрсөн 100 хоногт гадаадын хөрөнгө оруулалтыг татаж, хамтын ажиллагааг хөгжүүлэх, хууль эрхзүйн орчныг өөрчлөх шинэчлэх, бизнес эрхлэгчдийг дэмжсэн, төр хувийн хэвшлийн хамтын ажиллагааг илүү ойртуулсан хэд хэдэн ажлыг хийсний дотор Барилгын тухай хуулийн шинэчилсэн найруулгын төсөл байгаа. Үүнд түрүүнд салбарын хууль эрхзүйн орчинг боловсронгуй болгох, хуулийн гол үзэл баримтлал болох барилга эхлүүлээд дуусах хүртэлх үйл явцыг илүү оновчтой, тодорхой, хэрэглэхэд ойлгомжтой болгож, оролцогч талуудын эрх үүргийг тодорхой зааж, хариуцлагыг дээшлүүлэх тал дээр түлхүү анхаарч ажилласан гэдгээ сайд үг хэлэх үеэрээ мэдэгдсэн юм. Түүнчлэн барилга баригдсан дараалал, зөвшөөрөл, барилгын чанар аюулгүй байдал, ашиглалтын асуудлуудыг оновчтой тусгаж өгсөн гэдгийг тэрээр хэллээ.

     Стратеги, бодлого төлөвлөлтийн газраас өнгөрсөн 100 хоногийн ажлын хүрээнд гадаад орнуудын барилгын салбарын хөгжилтэй танилцан, барилгын чанар аюулгүй байдлын тогтолцоо, цэвэрлэх байгууламж, барилгын материалын импортын нэгдсэн хангамж, сорилт шинжилгээний лаборатори, авто тээврийн ложистик, евро стандартчилал зэрэг асуудлаар 20 гаруй орны зочид төлөөлөгчдийг хүлээн авч уулзан, зарим томоохон төсөл хөтөлбөрийг эхлүүлэх санамж бичигт гарын үсэг зуржээ.




Барилга, хот байгуулалтын сайд З.Баянсэлэнгэ: Барилгын салбарт 100 хоногт хийж бүтээсэн ажлаа шинэ оны зааг дээр танилцуулж байгааг минь хүлээн авна уу. Бид шинэ улирлаа шинэ бүтэц, зохион байгуулалттайгаар эхлүүлээд өнөөдөр 100 дахь хоногтойгоо золгож байна. Миний бие төр засгийн хүндтэй үүргийг хүлээж, Барилга хот байгуулалт хэмээх дэд бүтцийн томоохон салбарын бодлого, чиглэлийг хариуцаж, та бүхэнтэйгээ хамтран ажиллаж байгаадаа таатай байна. Өнгөрсөн хугацаанд манай хамт олон нэгэн зорилго чиглэлээр, сэтгэлээр чармайн ажиллаж, олон асуудлаар зөвлөлдөн хэлэлцсэн, санал солилцон хуралдсан, томоохон шийдвэрүүдийг гаргасан, зоримог алхмууд хийсэн өдрүүдийг үджээ. 100 хоног гэдэг цаг наргүй ажилласан үед богино мэт санагдавч мэргэжлийн баг, салбарын хамт олны маань хүчин чармайлтын дүнд дэвшүүлсэн зорилтууддаа хүрч чадсан билээ.

Засгийн газрын бүрэн эрхийн хугацаа  дуусах дөхсөн ч, бидний өмнө цаг нартай уралдан, улсынхаа төлөө энэ салбарт хийж хэрэгжүүлэх бүтээн байгуулалтын ажлууд олон байна. Эдгээр ажлыг амжилттай хийж, хэрэгжүүлэхийн төлөө алхам бүрийг үр дүнтэй ашиглах болно. Асар богино хугацаанд хийж гүйцэтгэх шинэчлэлийн ажлуудыг дэмжиж, Монгол Улсын хотжилтын явцад тулгарч буй асуудлыг үр дүнтэйгээр шийдвэрлэхийн тулд та бид төрийн болон төрийн бус байгууллагууд, ард иргэд, аж ахуйн нэгж байгууллагууд гар нийлж хамтран ажиллана гэдэгт итгэлтэй байна. Та бүхнийг санал бодлоо чөлөөтэй солилцон, өдөрлөгийн үйл ажиллагаанд идэвхтэй оролцохыг хүсч байна.