Барилга хот байгуулалтын яамнаас зохион байгуулсан “Сайдын 100 өдөр” нээлттэй өдөрлөгт хүрэлцэн ирсэн сэтгүүлч, хэвлэл мэдээллийнхэн төрийн ба төрийн бус мэргэжлийн байгууллагуудын тэргүүн, төлөөллүүдээс тодруулахыг хүссэн, хамгийн их асууж лавласан зүйл нь ипотекийн зээлийн 8 хувийн зээл хэвийн үргэлжлэх эсэх, зээлийн 10 хувийн урьдчилгааны хэрэгжилтийн талаарх асуудал байлаа. Энэ тухай тодруулахад,



БХБЯ-ны Стратеги, бодлого төлөвлөлтийн газрын дарга Х.Батболд: Өнөөдөр бид Голомт банктай хамтран ажиллах санамж бичигт гарын үсэг зурлаа. Энэ нь ипотекийн зээлийн 30 хувийн урьдчилгааг 10 хувь болгон бууруулах, үлдэгдэл 20 хувийг Засгийн газар батлан даах шийдлийг гаргасны дагуу тус банкны гүйцэтгэх захирал Л.Оюун-Эрдэнэтэй санамж бичигт гарын үсэг зурлаа. 20 хувьд нь банк, тухайн барилгын компани, БХБЯ баталгаа гаргахаар болж байна. Эхний ээлжинд 939 айлын орон сууцыг энэ зээлэнд хамруулах гэж байна. Нийслэл хотод 350, хөдөө орон нутагт 589 орон сууцыг хамруулж эхэлнэ. Энэ зээлэнд хамрагдахын тулд иргэд өмнө нь банк иргэнээс шаарддаг байсан бичиг баримтыг бүрдүүлэхэд хангалттай.

Арилжааны банкууд ипотекийн зээлийн олголтыг түр зогсоосон нь энэ шийдвэрт нөлөөлөх эсэх талаар лавлахад: Нөлөөлөхгүй. Засгийн газар болон салбарын яам ипотекийн зээлийг үргэлжлүүлнэ гэсэн төлөвлөгөөтэй байгаа. Ингэхийн тулд, банкууд болон барилгын компаниуд хоорондоо ойлголцох хэрэгтэй. Салбар яамны хувьд цаашид энэ зээлийг хэвийн үргэлжлүүлэх бодлогыг дэмжин ажиллана. Хугацааны хувьд тухйлбал Голомт банктай байгуулсан санамж бичгийн хүрээнд шууд хэрэгжээд эхэлж байна гэсэн үг. Арилжааны бүхий л банкуудтай барилгын компаниуд нь хамтарч ажиллаж байгаа учраас эрсдэл багатай гэж үзэж байна.