2020 онд Токиод болох Олимпийн цэнгэлдэх хүрээлэнгийн шалгаруулалтад сонгогдсон ч олон нийтээс ихээхэн шүүмжлэл хүлээгээд буй алдарт архитектор Заха Хадидын бүтээлтэй өрсөлдөх хоёр сонирхолтой загварыг Японы Спортын зөвлөлөөс танилцууллаа. Одоогоор нэрийг нь нууцалж байгаа уг хоёр хүрээлэнгийн ард Япон архитекторууд байгаа гэдгийг эх сурвалжууд мэдэгджээ. “А” хүрээлэнгийн загварыг Тоёо Ито, “В”-г нь Тайсэй Констракшн гаргасан гэнэ.

     Эдгээр нь Заха Хадидын эх загвараас арай бага бөгөөд өртөг нь ч хямд байх аж. Хадидын этгээд хийц загвартай хүрээлэнгийн төлөвлөлт 2012 онд шалгарсан боловч өртөг өндөртэй, дэндүү том хэмжээтэй гэх зэрэг хэд хэдэн шалтгаанаар олон нийтийн эсэргүүцэлтэй тулгарснаас ийнхүү дахин шалгаруулалтыг явуулжээ. Заха Хадидын зохион бүтээсэн загвар нь хэтэрхий өндөр өртөг шаардсан /2,1 тэрбум ам.доллар/, хүрээлэн буй орчинд зохицоогүй хэмээн ихээхэн шүүмжлэл дагуулсан билээ.

     Харин дээрх хоёр хүрээлэнгийн нийт төсөв 155 иенд багтаж байгаа бөгөөд хүрээлэн буй орчинд ээлтэй технологи ашигласан гэдгээрээ үнэлгээ өндөртэй байгаа аж. Шалгаруулалтад сонгогдсон ялагч нь төслийг хэрэгжүүлэх ажлыг 2017 онд эхлүүлж, 2019 оны 11-р сард ашиглалтад оруулах юм.