“Шийдлийн цаг” уузалтын хүрээнд Ерөнхий сайд Ч.Сайханбилэг, Барилга хот байгуулалтын сайд З.Баянсэлэнгэ, Засгийн газрын хэрэг эрхлэх газрын дарга С.Баярцогт, хотын дарга Э.Бат-Үүл, Ус сувгийн удирдах газрын дарга С.Үнэн болон албаны бусад хүмүүс Төв цэвэрлэх байгууламжид ажиллаж, ирэх онд шинэ цэвэрлэх байгууламжийн ажлыг яаралтай эхлүүлэх, түүнд шаардагдах санхүүжилтийн асуудлаар ярилцлаа.

     Шинэ цэвэрлэх байгууламжийн техник эдийн засгийн үндэслэлийн дагуу, 312 сая ам.долларын санхүүжилтээр сүүлийн үеийн технологи бүхий цэвэрлэх байгууламж барих боломжтой гэсэн тооцоолол гарчээ. 600 орчим тэрбум төгрөгийн уг санхүүжилтийг улсаас гаргах боломжгүй учраас концессийн гэрээ, эсвэл хөнгөлөлттэй зээлээр уг байгууламжийг байгуулах гарц байгааг өнөөдрийн уулзалтаар онцолсон юм. Гэхдээ Төв цэвэрлэх байгууламжийг байгуулах нь эн тэргүүний асуудал, хамгийн түрүүнд хэрэгжүүлэх ёстой бүтээн байгуулалт гэдгийг Ерөнхий сайд онцлон хэллээ.

     Өмнө нь Францын засгийн газрын зээлээр дээрх хөрөнгийг шийдвэрлэх боломжтой гэсэн санал яригдаж байсан ч, энэ нь шат дамжлага ихтэй, цаг хугацааны хувьд удаашралтай учир хөрөнгө оруулалтыг яаравчилж, ирэх оны хавар гэхэд бүтээн байгуулалтын ажлыг эхлүүлэхээр төлөвлөж байгаа аж. Түүнчлэн ил асгагдсан байгаа 400 мянган м/куб ялгадсыг цэвэрлэх 8.1 тэрбум төгрөгийн санхүүжилтийг шийдвэрлэж, нийслэл хотыг өмхий үнэрээс нь салгахаар болсон тухай мэдэгдлээ.