ШӨХТГ-аас СӨХ-ны үйл ажиллагааг олон нийтэд нээлттэй болгох үүднээс дансыг нь шилэн болгохоор шийдвэрлэжээ.
 
Тухайлбал, ШӨХТГ-ын санаачилгаар сууц өмчлөгчдийн холбоодыг дэмжиж, үйл ажиллагааг ил тод байлган иргэддээ хүрч ажиллах мөн ус, дулаан, цахилгаан гэх мэт төлбөр тооцоо гээд СӨХ-той нарийвчилсан бүхий л асуудлын мэдээ, мэдээллийг ойлгомжтой байлгахын тулд “МАНАЙ СӨХ” Фейсбүүк хуудсыг нээж өгөх арга хэмжээг зохион байгуулж байна.
 
Энэхүү үйл ажиллагааг маш үр бүтээлтэй хэрэгжүүлэн ажиллаж байгаа БГД-ийн "Сенатор”, “Мажестик” СӨХ- дийн үйл ажиллагааны туршлагыг хуваалцаж иргэдийг хэрхэн хамруулах, уг группт хэрхэн нэгдэх талаарх зааварчилгаа, зөвлөмжийг өгөхөөс гадна дээрх туршлага уг дүүрэгт амжилттай хэрэгжиж чадвал цаашид Нийслэлийн бүх дүүргийн СӨХ-дод хэрэгжүүлэхээр төлөвлөж байгаа юм байна. Ямартай ч байнгын хэл аманд өртөж хууль хяналтын байгууллагад шалгуулж байсан СӨХ-ны ажил одоо л цэгцрэх төлөвтэй боллоо гэж олон нийт ч ам сайтай байсан юм.
 
Энэхүү “шилэн” болгох үйл ажиллагаа амжилттай хэрэгжиж чадвал айл өрхүүд өөрсдийнхөө төлсөн мөнгийг юунд, хэрхэн зарцуулж байгаад хяналт тавих бүрэн боломжтой болж байгаа юм. 
 
СӨХ байнга хэл ам татдаг нь нууц юм. Туахйлбал, тус холбооны дээд зөвлөл гишүүнчлэлийн татвар гэх нэрээр СӨХ-доос төлбөр авдаг, тус байгууллагаас хууль бусаар тогтоосон тарифыг баримтлан төлбөрийг иргэдээс авдаг байсан нь тогтоогдож байсан. Мөн зарим СӨХ-г хууль тогтоомж зөрчиж оршин суугчдын оролцоогүйгээр байгуулсан зэрэг зөрчил олонтаа илэрдэг гээд зөрчлүүд ар араасаа хөвөрнө. 
 
Тиймээс Сууц өмчлөгчдийн холбооны эрх зүйн байдал, нийтийн зориулалттай орон сууцны байшингийн дундын өмчлөлийн эд хөрөнгийн тухай хуульд нэмэлт өөрчлөлт оруулах тухай хуулийн төслийг боловсруулж, холбогдох яам, агентлаг, нийслэл, дүүргийн Засаг даргын Тамгын газар, сууц өмчлөгчдийн холбоод, иргэдийн төлөөллийг оролцуулсан хэлэлцүүлэг зохион байгуулж санал хүсэлтийг нь авч хуулийн төсөлд тусгасан.
 
Ямартай ч ШӨХТГ-аас удаа дараа СӨХ-нд хяналт шалгалт хийж иргэдийг хохиролгүй болгох үүднээс тус газрын бүхий л тайлан тооцоог олон нийтэд ил болгох ажлыг эхлүүлсэн хэрэг. Хэрвээ энэхүү ажил амжилттай хэрэгжиж чадвал СӨХ-нд хаягласан хэл ам багасна гэж албаныхан тооцоолж байна.