Орон сууцны хомстлыг арилгах, эрэлтийг хангах зорилгоор Мексик улс нэгэн шинэ төсөл хэрэгжүүлэхээр болжээ. 120 сая хүн амд 30 сая орон сууц нь хүрэлцдэггүй энэ улс асуудлыг шийдвэрлэх гарц хайхаар олон талын боломжийг судалсны эцэст Татьяна Билбаогийн санаачилгыг дэмжсэн байна. Мехико хотын шигүү суурьшин амьдрах хүн амыг тав тухтай амьдруулахын тулд 9 сая орон сууц шаардлагатай байгаа аж. Харин хотын удирдлагууд Билбаогийн зохион бүтээсэн загварыг өртөг, зардал, хэмжээний хувьд олон янзын гэр бүлд тохиромжтой гэж үзсэн байна.

     Хамгийн гол нь бага, дунд орлоготой иргэдийг олноор нь хамруулах уг төслийн байшинд өртөг нь хямд, чанартай байх шаардлага тавигдаж байгаа аж. Боломжийн хямд үнэтэй материал ашиглан, сайн чанартай, доод тал нь 43 ам метр талбайтай байх, оршин суугч өөрийн хүссэнээр өөрчлөн засах боломжтой гэх нөхцлийг хангаад буй уг сууцыг барихад 8,000 доллар шаардлагатай юм байна.