Египетийн Эртний үнэт дурсгалын асуудал хариуцсан яамнаас Александриагийн тохойд усанд автсан эртний сөнөсөн хотын тууринд үндэслэн далай доорх музейг байгуулахаар болжээ. Уг төслийн төлөвлөгөөг анх 1998 онд санаачилсан ч тодорхой шалтгааны улмаас хойшлоод байсан ч тун удахгүй хэрэгжүүлэх гэж байгаа аж. Францын архитектор Жак Роужери болон Египетийн ард түмэн энэхүү хойшлогдсон төслийг ихээхэн дэмжиж байгаа бөгөөд энэ нь дэлхийн хамгийн анхны усан доорх музей болох юм.

     Усан доорх үзэсгэлэнгийн хэсгийг эх газарт байгаа танхимуудтай холбосон шилэн хуванцар нүхэн гарцнууд хийх учраас үйлчлүүлэгчид хоёр хэсэгт үзвэр үзэх боломжтой аж. Александриагийн Усан доорх Археологийн Музейн төслийг хэрэгжүүлэхэд маш олон саад учирч байсан. Түүний нэг нь далайн усны бохирдлын асуудал байв.

     Харин ЮНЕСКО-ийн Усан доорх Соёлын өвийг хамгаалах конвенц, Египетийн засгийн газартай хамтран ажиллаж, Александриагийн тохойн бохирдлыг цэвэрлэх зэргээр музейг байгуулах ажилд дэмжлэг үзүүлсэн байна. Төслийн зардлыг 150 сая орчим доллар болно гэж судалгааны багийнхан үзжээ.