Улаанбаатар хотын Захирагчийн ажлын албаны инженер хангамж, нийтийн үйлчилгээний 18 харьяа газар өнөөдөр 2013-2015 онд хийж хэрэгжүүлсэн ажлаа тайлагналаа.

Улаанбаатар хотын шуурхай удирдлага зохицуулалтын төвийг байгуулсан явдлыг онцолсон. Тус төв нь байгуулагдсанаасаа хойш нэг жилийн хугацаанд 6300 орчим гомдол саналыг хүлээн авч шуурхай шийдвэрлэсэн байна.

Мөн цогц удирдлага, ажлын уялдаа холбоо, байгууллагын санхүү эдийн засгийн нөхцөл байдлыг сайжруулах ажлыг хийж гүйцэтгэсэн байна. Тодруулбал нийтийн үйлчилгээний Улаанбаатар нэгтгэл, Орон сууц нийтийн аж ахуйн удирдах газар, Ус сувгийн удирдах газар, Хэсэгчилсэн инженер хангамжийн удирдах газар гэсэн байгууллагуудад бүтцийн өөрчлөлтийг санаачлан хэрэгжүүлэв.

Түүнчлэн ахмадын орон сууц хөтөлбөрт 302 иргэнийг хамруулж, 39.8 км урт дулааны шугамыг өргөтгөн шинэчлэн, 12 мянган өрхийн цахилгааны хүчдэлийг сайжруулж, шинээр 6154 өрхийг цахилгаан эрчим хүчинд холбосон байна. Үүнээс гадна ногоон байгууламж, хог хаягдлын асуудал, бусад асуудлын хүрээнд дорвитой ажлуудыг хийж гүйцэтгэн тодорхой үр дүнд хүрсэн байдлаа Захирагчийн ажлын алба тайлагнажээ.