Байгалийн гэрэл түлхүү тусгасан, жижигхэн байшинтай болохыг хүсэгчдэд нэгэн шинэ төрлийн цонхыг танилцуулъя. Брүүклиний зохион бүтээгч Алдана Феррер Гарсия “More Sky” нэртэй уг шинэлэг цонхыг байшинд нарны гэрлийг илүү ихээр тусгаж, агаарын солилцоог сайжруулах зорилгоор санаачлан бүтээжээ. Шил болон мод ашиглан маш боловсронгуй болгон бүтээсэн уг цонх нь хананаас илүү гаран гадагш цухуйдаг. Хэрэглэгч цонхыг гэдрэг түлхэнгээ тухлан налж суугаад нарны тусгал, тэнгэр рүү харах боломжтой аж.

     Гарсия энэхүү цонхыг үйлдвэрлэлийн дизайны чиглэлээр хамгаалах Мастерын зэрэг горилж буй судалгааныхаа ажлын хүрээнд бүтээсэн байна. Ингэхдээ тэрээр хамгийн алдартай цонхны төрлүүдийг судалж, нарны тусгалыг сайн нэвтрүүлэх цонх бүтээх тал дээр анхаарал хандуулжээ.