Манай улсад хөрөнгө оруулагч орнуудыг сүүлийн 15 жил Хятад Улс тэргүүлж байна. 1990-2014 оны байдлаар Хятад улс 3,7 тэрбум ам.долларын хөрөнгө оруулалт хийсэн бөгөөд үүний 2,1 хувь нь барилгын салбарт ногдож байгаа юм.

Өнөөдөр "Монгол Хятадын бизнес эрхлэгчдийн анхдугаар чуулган" Чингис зочид буудалд болж байна. Тус чуулга уулзалтыг БНХАУ-ын хөрөнгө оруулагчид, Монгол улсын бизнес эрхлэгчид, Гадаад Хэргийн Яам хамтран зохион байгуулж байгаа аж. Чуулга уулзалтаар бизнес эрхлэгчид хөрөнгө оруулалтын орчныг хайх, Хятад улсад бизнес эрхлэх боломж, зээл тусламж мөн тус улсын аль бүс нутагт бараа бүтээгдэхүүн хамгийн хямд, өргөн сонголттой байгаа, түүнийг хэрхэн хялбараар авч болох, импортлох гарцын тухай дэлгэрэнгүй мэдээллийг өгсөн юм. Уулзалтад Бээжин, Эрээн, Хөх хот, Гуанжу зэрэг хотын  21 аж ахуйн нэгжийн төлөөлөл, Монголын 100 гаруй бизнес эрхлэгч, байгууллага оролцлоо.

Дашрамд дурьдахад, Монгол Улсын Үндэсний Статистик хорооноос гаргасан мэдээллээс үзэхэд 2015 оны эхний 10 сарын байдлаар манай улсын БНХАУ-тай хийж буй худалдааны нийт эргэлт 4,41 тэрбум ам.доллар буюу нийт гадаад худалдааны 63 хувийг дангаар эзэлдэг. Үүнээс Хятад улс 3,27 тэрбум ам.долларын бүтээгдэхүүн экспортолсон нь Монгол Улсын нийт экспортын 83 хувь, импортын 37 хувийг эзэлж байна.