УИХ-ын Хууль зүйн Байнгын хорооны өнөөдрийн хуралдаанаар Иргэний хуульд нэмэлт оруулах тухай болон Үл хөдлөх эд хөрөнгийн барьцааны тухай хуульд өөрчлөлт оруулах тухай хуулийн төслүүдийн анхны хэлэлцүүлгийг хийлээ.

     Хэлэлцүүлгийн шатанд зарчмын зөрүүтэй санал байхгүй тул хуулийн төслийг анхны хэлэлцүүлгээр нь батлах нь зүйтэй гэсэн горимын саналыг УИХ-ын гишүүн Р.Гончигдорж гаргасныг гишүүд 90.9 хувийн саналаар дэмжжээ. Ингэснээр анхны хэлэлцүүлгээр нь батлахыг дэмжих санал хураалт явуулснгыг хуралдаанд оролцсон гишүүдийн олнх нь дэмжиж, хуулийн төслийг чуулганы нэгдсэн хуралдаанаар хэлэлцүүлэхээр тогтсон байна.

     Мөн Байнгын хорооны хуралдаанаар Үндсэн хуулийн цэцийн тухай хуульд өөрчлөлт, оруулах тухай, Үндсэн хуулийн цэцэд маргаан хянан шийдвэрлэх ажиллагааны тухай хуульд нэмэлт, өөрчлөлт оруулах тухай, УИХ-ын чуулганы хуралдааны дэгийн тухай хуульд өөрчлөлт оруулах тухай хуулийн төслүүдийн эцсийн хэлэлцүүлгийг хийж, чуулганы нэгдсэн хуралдаанаар хэлэлцүүлж батлуулах саналыг гишүүдийн зуун хувийн саналаар дэмжсэн байна.