Дэлхийн хамгийн өндөр үнэтэй 10 орон сууц
Дэлхийн хамгийн чинээлэг иргэдийг тодруулж эрэмбэлдэг Сингапурын “Wealth-X” судалгааны байгууллага алдартай 10 тэрбумтны тэнгэр баганадсан тансаг орон сууцнуудын жагсаалтыг гаргажээ. Энэтхэгийн хамгийн баян тэрбумтан Мукеш Амбанигийн Мумбай дахь 27 давхар орон сууц одоог хүртэл хамгийн өндөр өртөгтэйд тооцогдсон хэвээр байна. Нэг тэрбум ам.долларын үнэтэй “Антилиа” гэх уг орон сууц нь 37,160 орчим ам метр талбайтай ч кондо болон пентхаус төрөлдөө хамгийн өндөр үнэтэй тансаг орон сууц гэгддэг.
Хамгийн өндөр өртөгтэй, шилдэг 10 орон сууцны жагсаалтыг харвал:
“Ван Хайд Парк”, Лондон, Их Британи
Пентхаус: 226,9 сая ам.доллар
Гольфийн загварчилсан талбай, хувийн кино театр, теннис тоглох заал бүхий энэ байр Лондонгийн хамгийн тансаг орон сууц ч байж мэдэх юм.
Парк Авеню 432, Нью-Йорк, АНУ
Пентхаус: 95 сая ам.доллар
Манхэттаны төв хэсэгт байрладаг, 2015 онд ашиглалтад орсон уг барилга Нью-Йорк хотын хамгийн өндөр орон сууцны барилгад тооцогдож байгаа юм. Пентхаус нь унтлагын 6, угаалгын 7 өрөөтэйгөөс гадна номын сангийн өрөөтэй аж.
“Ван 57” Нью-Йорк, АНУ
Пентхаус: 90 сая ам.доллар
Мөн л Манхэттаны төв хэсэгт байрлах “Ван 57” нь Нью-Йоркын орон сууцны хамгийн өндөр барилгуудын нэг буюу 300 гаруй метрийн өндөртэй. Үүнд 95 ширхэг кондо буюу дээд зэрэглэлийн орон сууц, иогийн төв болон гэрийн тэжээвэр амьтдад зориулсан цэвэрлэгээний өрөө зэрэг үйлчилгээний газрууд бий.
“Өмнөд банк” цамхаг, Лондон, Их Британи
Пентхаус: 90 сая ам.доллар
Энэ нь тансаг зэрэглэлийн 191 айлын орон сууц, оффисийн зориулалттай талбайг агуулсан 41 давхар барилга юм. Ердөө 2015 онд ашиглалтад орсон, Тэймс голын эрэг дээрх уг барилга дээрээс Лондонгийн алсыг харагчаас ч илүү орчныг ажиглах боломжтой.
“Тур Одеон”, Монако
Тансаг зэрэглэлийн орон сууц: 56,7 сая ам.доллар
167 метр өндөр “Тур Одеон” нь Монакогийн хамгийн өндөр орон сууцны барилга юм. 2014 онд ашиглалтад орсон энэ барилга дээрээс Газар дундын тэнгисийг ч харах боломжтой.
“Опус” Хонконг, Хонконг
Үнэ: 58,6 сая ам.доллар
12 давхар уг барилгын 8 дахь давхрын орон сууц нь Хонконгийн хамгийн өндөр үнээр зарагдсан байр аж. Энд борооны усаар усжуулалтын системээ шийдэж, цахилгаан автомашин цэнэглэх систем суурилуулсан гээд байгаль орчинд ээлтэй олон давуу шийдэлтэй баригджээ.
“Леонард 56” Нью-Йорк, АНУ
Пентхаус: 47 сая ам.доллар
Манхэттаны бизнес дүүрэгт байрлах уг пентхаусын цонх нь шалнаас тааз хүртэл үргэлжлэх тул хотын орчин тойрныг харах таатай нөхцөлийг бүрдүүлжээ. Барилгын доод давхарт Аниш Капурын хөшөөнөөс гадна 25 хүний суудалтай кино танхим, 22 метр бүхий гарааны усан сан байдаг аж.
“Клермонт” орон сууц, Сингапур
Пентхаус: 47 сая ам.доллар
Алдарт “Бурж Халиф” болон Нью-Йоркийн “Ван Ворлд” худалдааны төвийн барилгыг зохион бүтээсэн архитекторууд энэхүү орон сууцны барилгыг барьж гүйцэтгэж байгаа аж. “Клермонт” нь 2016 онд ашиглалтад орно.
“Ван Таусанд Музейм Кондо” Маяами, АНУ
Пентхаус: 45 сая ам.доллар
Нисдэг тэрэгний буух, хөөрөх талбайтай уг тансаг зэрэглэлийн орон сууцны хоёр давхар бүхий спа, наран шарлага, алжаал тайлах төвтэй тэгш хавтгай дээврээс нь (террас) Маяами хотын орчин тойрныг харж, амрах боломжтой аж.
“Ван Мэдисон” Нью-Йорк, АНУ
Пентхаус: 43 сая ам.доллар
60 давхар бүхий гоёмсог шилэн энэ цамхагт ердөө 53 орон сууц бий. Энд Америкийн хөлбөмбөгчин Том Брэди, Бразилийн загвар өмсөгч Жизель Бундхен гээд олон алдартай оршин суугчид амьдрах ажээ.