Засгийн газрын 2016 оны нэгдүгээр сарын 11-ний өдрийн хуралдаанаар “Түрээсийн орон сууцны хөтөлбөр”-ийн энэ оны төлөвлөгөөг хэлэлцэн баталжээ. Энэ талаар Барилга, хот байгуулалтын яамны Стратегийн бодлого, төлөвлөлтийн газрын дарга Х.Батболдоос тодрууллаа.
 
-Энэ удаагийн Засгийн газрын шийдвэрээр хаана, хэчнээн айл хөтөлбөрт хамрагдахаар болов?

Засгийн газрын 2013 онд баталсан мөрийн хөтөлбөрийн хүрээнд 2016 он хүртэл жил бүр 1000 өрхийг түрээсийн орон сууцны хөтөлбөрт хамруулна гэж заасан. 2017-2020 онд жил бүр 2000 өрхийг мөн энэ хөтөлбөрт хамруулах зорилт бий. Үүний хүрээнд Засгийн газар “Түрээсийн орон сууцны хөтөлбөр”-т ТОСК-ийн бариулсан барилгуудаас 929 айлын орон сууцыг авахаар боллоо. Ингэхдээ тэдгээр орон сууцнуудаас бага борлуулалттай хэсэг буюу орон нутагт арай ахиу, нийслэлд харьцангуй бага хувийг оноосон. Үүнд, Архангай аймагт 120, Увсад 105, дархан-Уул 189, Зүүн хараа 126, Хэнтий 120, Ховд 120, Бор-Өндөр 10 буюу орон нутагт нийт 579, нийслэлд “Буянт”Ухаа 2” хорооллын 1620 айлын орон сууцны 350 нь байх юм.

-Түрээсийн үнийг хэр ялгамжтай байхаар тогтоосон бэ?

Засгийн газрын мөрийн хөтөлбөрт Төрийн болон орон нутгийн өмчийн нэг айлын түрээсийн орон сууцны талбай 30-50 м2, түрээсийн орон сууцны түрээсийн үнэ тухайн айл өрхийн сарын орлогын 25 хувиас ихгүй байна гэж заасан байдаг. Тэгэхээр бид 2015 оны 12 сарын байдлаар нэг өрхийн сарын орлогыг судлаад нийслэл хотод дунджаар 1.133.851, орон нутагт 915.054 төгрөг байна гэж гаргаж ирсэн. Эдгээр үндэслэлүүд дээр ТОСК-ийн орон сууц 1.350.000 төгрөгийн үнэтэй байгаатай нийлүүлж тооцоо хийгээд Улаанбаатар хотод 200-280 мянга, орон нутагт 140-230 мянган төгрөгийн түрээсийн төлбөртэй байна гэж тогтоож Засгийн газрын хуралдаанд санал оруулсан маань батлагдлаа.

-Энэ тооцоо нь амьдралд хэр нийцтэй, үнэн бодитой байгаа бол?

Манай яам Японы “Жайка” төсөл, Азийн хөгжлийн банк, Дэлхийн банктай хамтарч судалгааны төсөл хэрэгжүүлдэг. Өнгөрсөн оны арваннэгдүгээр сард энэ төслийн ажлын хэсгийнхэн танилцуулга хийхэд түрээсийн орон сууцны үнэ 228.000 төгрөг байвал олон иргэнд орох боломж үүснэ гэж тооцоо гаргаж өгсөн. Энэ төслийн тооцоо, манай яамны гаргасан дүгнэлт 2 үндсэндээ ижил шахуу хэмжээтэй гарсан нь энэ үнэ үнэн бодитой гэдгийг харуулж байгаа юм. Бид ч тооцоог янз янзын хувилбараар хийж, нийлүүлж, харьцуулж үзэж байж, эцсийн дүнг гаргаж байгаа болохоор энэ тоог баттай гэж нотолж чадна.

-Ипотекийн зээл авч байртай болж чадахгүй иргэд түрээсийн орон сууц сонирхох нь гарцаагүй. Түрээсийн орон сууцны эрэлт, хэрэгцээг хэр байна гэж тооцоолж байгаа вэ?

2015 оны 248 дугаар тогтоолоор “Түрээсийн орон сууцны хөтөлбөр”-ийг баталсан. Үүний дагуу түрээсийн орон сууцанд орох сонирхолтой өрхүүдийн дунд судалгаа хийхэд 2013 онд 18.4 мянга байсан бол 2014 онд 22.9, 2015 онд 27-28 мянган өрх болж нэмэгдсэн байдаг.