Барилгын зураг төслийн салбарт үйл ажиллагаа явуулдаг аж ахуйн нэгж, хувь хүмүүсийг сайн дурын үндсэн дээр нэгтгэн, гишүүд болон нийгэмдээ үйлчилдэг Барилгын Зураг төсөл зохиогчдын холбооныхон “Бүх гишүүдийн хурал”-аа хийлээ. Салбарын 123 компани, байгууллага, мэргэжилтнийг төлөөлөн дуу хоолой нь болдог тус холбооны ерөнхийлөгч Н.Дорж, гүйцэтгэх захирал М.Батбаяр, Хяналтын зөвлөлийн дарга Д.Цэвэлмаа УЗ-ийн гишүүн Н.Цогтоо нар 2016 оны ээлжит энэхүү хурлаар холбооны зүгээс өнгөрсөн онд хийж гүйцэтгэсэн ажлын тайлан, 2016 оны төсөл төлөвлөгөө болон “Барилгын ажлын явцад зохиогчийн хяналт тавих дүрэм” /БНбД11-04-15/-ийг танилцуулсан юм. Түүнчлэн хурлын үеэр Барилгын Зураг төсөл зохиогчдын холбоо нь Нийслэлийн хөрөнгө оруулалтын газартай хамтран ажиллах гэрээ үзэглэх ёслол боллоо.









Барилгын Зураг төсөл зохиогчдын холбооны ерөнхийлөгч Н.Дорж:



- Энэ удаагийн “Бүх гишүүдийн хурал”-ын зорилго, онцлог юу вэ?

- Бид холбооныхоо дүрэм ёсоор жил бүрийн нэгдүгээр сард өнгөрсөн жилийнхээ ажлын тайланг танилцуулж, гишүүдээрээ дүгнэлт хийлгэдэг. Өнгөрсөн оныхоо ажил, төсвийн гүйцэтгэл, Хяналтын зөвлөлийн тайланг танилцуулж, гишүүдийнхээ санал, шүүмжийг сонсож хэлэлцүүлэг өрнүүлдэг. Үүний дараа ирэх оныхоо төлөвлөгөө, төсвийг баталдаг. Түүнчлэн хурлаар тулгамдаж буй асуудлаа ярилцаж, цаашид ажиллах чиглэлээ тодорхойлдог.

- Албан ёсны хэдэн гишүүнтэй вэ? Үүнээс хэд нь холбооныхоо үйл ажиллагаанд идэвхтэй оролцож байна?

- Одоогоор 123 гишүүн компанитай байна. Өнөөдрийн хуралд ирсэн 66 гишүүн бол үйл ажиллагаанд хамгийн идэвхтэй оролцдог гишүүд юм.

- 2015 онд Барилгын Зураг төсөл зохиогчдын холбооны хийж гүйцэтгэсэн ажлуудаас дурдвал...

- Бид зураг төсөлтэй холбоотой гурван стандартыг шинээр боловсруулан батлуулсан. Мөн барилгын ажлын явцад “Зохиогчийн хяналтын дүрэм”-ийг шинэчилж батлуулсан. “Барилга байгууламж дахь галын аюулгүй байдлын төлөвлөлт” гэсэн сэдвээр найман сургалт зохион байгуулсан. Өнгөрсөн онд гүйцэтгэсэн хамгийн гол гурван ажил энэ юм.

- Энэ онд хийхээр төлөвлөсөн гол ажлуудаасаа танилцуулахгүй юу?

- Өнөөдрийн хурлаар гишүүд маань ярилцаад, 2016 онд зураг төслийн ажлын чанарыг сайжруулахад үйл ажиллагаагаа чиглүүлэх санал гаргасны дагуу төлөвлөгөөгөө баталж байна. Бид сүүлийн гурван жилд зураг төсөлтэй 20 гаруй стандартыг санаачлан батлуулсан. Мөн барилгын хэд хэдэн норм ба дүрмийг боловсруулсан. Эдгээрийг гишүүддээ танилцуулах сургалт семинар төлөвлөсөн байгаа. Мөн Барилгын хөгжлийн төвтэй хамтран ажиллах гэрээ байгуулж, зураг төслийн магадлалын үйл ажиллагаа болон түүнтэй холбоотой тодорхой ажлуудыг хамтран хийх төлөвлөгөөтэй байна. Эдгээр нь барилгын зураг төслийн чанарыг сайжруулахад чиглэгдсэн. Тэгэхээр магадлалаар гарч ирсэн нийтлэг алдааг илрүүлж, түүнд арга хэмжээ авах, сургалтуудыг чиглүүлэх зэргээр ажиллана.

- Нийслэлийн хөрөнгө оруулалтын газартай хамтран ажиллах гэрээ байгууллаа. Хамтын ажиллагааны гол чиглэлүүд юу вэ?

- Нийслэлийн хөрөнгө оруулалтын газар бол зураг төсөл, барилга угсралтын ажлуудыг санхүүжүүлж, зохион байгуулж, хяналт тавьдаг байгууллага. Өмнөх жилүүдэд хийгдсэн зураг төслийн ажлууд дээр гарсан нийтлэг дутагдлуудыг арилгаж, барилгын ажлыг чанаржуулахад хамтран ажиллах зорилгоор энэхүү гэрээг байгууллаа. Хамтын ажиллагааны гэрээнд барилгын ажлын явцад гүйцэтгэх зохиогчийн хяналтын ажлын чанарыг сайжруулах гол чиглэлийг тусгасан байгаа. Энэ төлөвлөгөөний дагуу холбооны гишүүн байгууллагууд НХОГ-тай хамтран жилд нэг удаа зөвлөгөөн зохион байгуулна. Зөвлөгөөнөөр нийтлэг тохиолдож байгаа хүндрэлүүдийг шийдэх юм. НХОГ нь томоохон захиалагчдын нэг учраас ийнхүү хамтран ажиллах гэрээг байгуулж байна. Өмнө нь харилцан шүүмжлэлтэй ханддаг байсан бол гэрээ байгуулснаар, асуудлыг шийдэх гарцыг хамтдаа хайж, хамтран ажиллах боломжтой болж байна.