Тэнгэр баганадсан өндөр барилгууд өдрөөс өдөрт нэмэгдсээр. Хамгийн сүүлд дэлхийд өндрөөрөө хоёрдугаарт, Хятадын хувьд хамгийн өндөрт тооцогдох Шанхайн цамхаг баригдаж дууссан байна. 632 метр өндөр уг барилга ашиглалтад орсноор 1974 онд Чикагод баригдсан Виллис цамхаг дэлхийн хамгийн өндөр 10 барилгын жагсаалтаас хасагджээ. Шанхайн цамхаг нь өндөр чанартай фасад, цэцэрлэгт хүрээлэн, борооны ус хуримтлуулагч систем, салхин хөдөлгүүр гэх мэт байгаль орчинд ээлтэй олон янзын шинэ дэвшилтэт технологийг ашигласнаараа онцлогтой аж.

     Муруй фасад, эрчлээсэн загвар нь орчин цагийн Хятадыг илэрхийлэх нэг хэлбэр боловч нөгөө талаар салхины ачааллыг бууруулах давуу талтай юм. Энэ нь ижил хэмжээний өндөртай гурвалжин барилгатай харьцуулахад салхины ачааллыг 24 хувиар бууруулах сайн талтай. Барилга нь байгалийн гэрлийг дээд зэргээр тусгадгаараа давуу төдийгүй “Мицубиши”-гийн хамгийн хурдан цахилгаан шатыг ашиглажээ.