CNN телевизээс 2016 онд аялахад хамгийн таатай 16 газрын жагсаалтад манай улсыг онцлон багтаажээ. Энэ онд аялагчид хөгжиж буй орнуудын аялал жуулчлалыг дэмжих хандлагатай, эдгээр орнуудад жуулчид ихээхэн анхаарал хандуулах төлөвтэй байгаа гэсэн таамгийг гаргажээ. Үүнд, Шинэ Гвиней, Исланд Гринланд Норвеги, Мадагаскар, Иран, Тайвань, Уганда, Гүрж, АНУ-ын Умард Каскадын цэцэрлэгт хүрээлэн, Патагонийн хонгил, Палау, Өмнөд Гүржийн арал буюу Антарктид, Гондурас, Габон, Румын, Монгол гээд нийт 16 улс, бүс нутгийг багтаасан байна. Дэлхийд алдартай энэ мэдээллийн хэрэгсэл манай орны ямар онцлогийг харгалзан ийнхүү аялахад тохиромжтой газруудын нэгээр нэрлэснийг хүргэе.

     “Чингис хааны өлгий, алдарт Торгоны зам, Говь цөлийн нутаг хосолсон, Орос, Хятад гэх хоёр их гүрний дунд орших Монгол улс нь одоогийн байдлаар дэлхий дээрх хамгийн их нэрд гарч буй орнуудын нэг болоод байна. Ялангуяа монголчуудын амьдралын өвөрмөц нууцлаг хэв маяг нь жуулчдын анхаарлыг ихээхэн татах бололтой. Нүүдэлчин малчдын сарлаг, тэмээ хариулан зах хязгааргүй мэт ногоон тал нутагт улирал даган нүүдэллэж, гэр хэмээх өвөрмөц онцлогтой сууцанд амьдардаг хэв маягийг сонирхсон жуулчдын цуваа тасрахгүй гэсэн таамгийг мэргэжилтнүүд дэвшүүллээ.

     Монголын Засгийн газар 2020 он гэхэд бүх аймгийг Улаанбаатар хоттой засмал замаар холбохоор төлөвлөн ажиллаж байгаа аж. Зориг тэвчээрийг шалгасан жинхэнэ адал явдалтай учирч, их хотын чимээ шуугианаас тасран холдохыг хүссэн жуулчдын очих газар бол яах аргагүй Монгол юм. Энэ улсад жилийн таваас есдүгээр сар хүртэлх хугацаанд аялахад илүү тохиромжтой. Тухайлбал, долдугаар сарын дундуур болдог “Наадам”-ын үеэр очвол үзэх харах зүйл ихтэй байдаг. Үндэсний бөхийн барилдаан, сур харваа, морь уралдуулах эрийн гурван наадам нь бүр ч сонирхолтой” хэмээн тус мэдээлэлд манай улсын талаар товч танилцуулжээ.