Гонконгт буурч буй үл хөдлөх хөрөнгийн үнэ эсрэгээрээ Шенженьд сэргэж эхэллээ. Өнөө цагт хурдацтай хөгжиж буй Шенженьд орон сууцны үнэ сүүлийн нэг жилийн хугацаанд 30 гаруй хувиар өсөж, Хятадын үл хөдлөх хөрөнгийн салбарт голлох зах зээл болоод байна. Харин Гонконгийн тансаг зэрэглэлийн орон сууцны үнэ сүүлийн гурван сард таван хувиар буурчээ. Хятадын эдийн засаг бүхэлдээ сул байгаа ч, интернэт, технологийн компаниудын үйл ажиллагаа өргөжин тэлж буйн ачаар Шенжень хурдацтай хөгжсөөр байгаа юм.

     Тус хотын дундаас дээш түвшний амьдралтай иргэдийн оршин суудаг Лоху дүүрэгт унтлагын хоёр өрөөтэй 53 ам метр бүхий орон сууцны үнэ 400 мянган ам.доллараас давжээ. Харин Хятадын эдийн засгийн өсөлт саарснаас гадна ерөнхийлөгч Си Жинпиний санаачлан хэрэгжүүлж буй авилгын эсрэг өрнүүлсэн кампанит ажлын улмаас Гонконгийн тансаг орон сууцны зах зээл сайнгүй байгаа аж. Харин Бээжин, Гуанчжоу, Шанхай, Шенжень хотуудад орон сууцны үнэ харьцангуй тогтвортой байна.