Өнгөрсөн оны хувьд архитектурын шийдэлд олон давуу талыг авчирсан чухал жил байсан гэж CNN онцолжээ. Заха Хадидын эгц хана бүхий Элпайн музейгээс Херцог ба Мейроны Парисын цамхаг, 2020 оны Токиогийн Олимпийн цэнгэлдэх хүрээлэнгийн барилга гээд олон төслийн эхлэл 2015 онд тавигдсан. Тиймээс CNN 2016 онд барилгын салбарын хөгжлийг тодорхойлох чухал 9 барилгыг онцлон нэрлэжээ.



1. Энэ онд Абу Даби хотноо “Заяид” Үндэсний музей нээлтээ хийх гэж буй нь Арабын Нэгдсэн Эмират улсын хувьд чухал үйл явдал юм. Тус улсын түүх, соёлын үнэт өвийг хадгалах зориулалттай уг музейн барилгын загварыг шувууны далавчны хэлбэрээс санаа авч зохиожээ. Үүнийг “Прицкер”-ийн шагналт Британийн архитектор Норман Фостер зохион бүтээсэн аж.



2. Мөн л Абу Даби хотноо баригдаж буй “Лувр”-ын барилгын загварыг “Прицкер”-ийн шагналт Францын архитектор Жан Новел зохион бүтээжээ. Үүний ган хийц бүхий дээврийг гэрлэн бороо орж буй мэт харагдуулахаар санаачилсан байна.



3. Сантьяго Калатрава нь Нью-Йорк хотноо баригдах Дэлхийн худалдааны төвийн Тээврийн үйл ажиллагааны газрын барилгын загварыг танилцуулснаас хойш 12 жил өнгөрчээ. Учир нь санхүүгийн өртөг зардал нэмэгдсэнтэй холбоотойгоор барилгын ажлыг хэд хэдэн удаа хойшлуулсан байна. Гэвч эцэст нь 2016 онд бүрэн ашиглалтад оруулахаар шийджээ. Калатрава уг барилгыг хүүхдийн гарт буй шувуу мэт дүрсэлсэн байна.



4. Юинсент Каллебот нь Тайванийн Тайпэй хотод баригдах Тао Жу Еин Юань цамхагийн загварыг анх 2010 онд зохион бүтээжээ. Агора Гарден хэмээх нэрээрээ олонд танил болсон уг цамхагийг дэлхийн хамгийн алдартай экологид ээлтэй барилгын нэг болгох зорилгоор санаачилсан байна. Энэ нь өөрийн гэсэн цэцэрлэгт хүрээлэн, ой модтой, органик хог хаягдал болон усаа өөрөө дахин боловсруулж, цэвэршүүлдэг төдийгүй нарны эрчим хүчээр өөрийгөө хангадаг гээд олон давуу талтай аж.



5. Тайванийн Тайпэй хотод баригдах Урлагийн төвийн барилгыг том бөмбөрцгийг хүрээлсэн араг хүрээ бүхий хүлэмж мэт өвөрмөц загвараар зохион бүтээжээ.



6. Флорида мужид баригдах Латин Америкийн Урлаг, дизайны музейн барилгын загварыг архитектор Фернандо Ромеро зохион бүтээжээ. 90,000 ам метр талбай бүхий энэхүү барилга нь том хэмжээний хэд хэдэн террастай аж. Энэ нь үйлчлүүлэгчдийн чөлөөтэй зугаалах, тав тухтай байх орчныг бүрдүүлэх давуу талтай юм байна.



7. Английн Лондон хотын Тате Модерн урлагийн музейн барилгыг шинэчлэх ажлыг “Прицкер”-ийн шагналт “Herzog & de Meuron” хариуцан ажиллахаар болжээ. Өмнөх барилгатай нь харьцуулахад загвар нь төстэй мэт боловч хэт орчин үеийн хэв загварыг илэрхийлэхүйц зохион бүтээгдсэнээрээ ийнхүү жагсаалтад багтсан аж.



8. Африк гаралтай америкчуудын түүх, соёлын өвийг хадгалах Үндэсний музейн барилгын загварыг Танзани гаралтай Дэвид Аджэй гаргажээ. Тэрээр Вашингтон хотноо 2016 онд багтаан уг музейн барилгыг дуусгахаар төлөвлөсөн байна.



9. Хятадын Шенжень хотноо энэ онд нээгдэх 100 давхар бүхий “Пинг Ан” санхүүгийн төв нь дэлхийд дөрөвдүгээрт тооцогдох өндөр барилга болох аж. Түүгээр ч зогсохгүй байгальд ээлтэй үзүүлэлтүүдээрээ энэ нь эрчим хүчний хэмнэлттэй барилгын алтан гэрчилгээ, ногоон архитектурын гэрчилгээ зэргийг хэдийнэ хүртсэн байна.