Хүйтний улирал эхэлж, цаг агаар хасах хэм рүү шилжсэн тул барилгын цутгалтын ажил хийхгүй байхыг МХЕГ-аас анхааруулав. Мэргэжлийн хяналтын байгууллагын Дэд бүтцийн хяналтын газар 2014 онд улсын хэмжээнд 6463 аж ахуйн нэгж, иргэний барьж байгаа 3478 барилгын ажилд хяналт шалгалт хийжээ. Хяналтын хуудас, эрсдэлийн шалгуураар үнэлэхэд 403 барилга их эрсдэлтэй гэж үнэлэгдсэн байна.

Тиймээс болзошгүй осол, эрсдэлээс урьдчилан сэргийлэх, бууруулах, таслан зогсоох үүднээс хөрөнгө оруулагч, захиалагч, гүйцэтгэгч аж ахуйн нэгжүүд барилгын дүрэм, стандартаа мөрдөх шаардлагатай байгааг санууллаа.

Хүйтэнд даацын бүтээцийн бетон цутгаснаас зуурмаг бэхжихгүй хөлдөж, барилгын бат бэх, чанарт сөргөөр нөлөөлж, улсмаар осол гарах эрсдэл үүсдэг. Улсын хэмжээнд сүүлийн гурван жилд барилгын 164 удаагийн осол гарч, 178 хүн өртсөний 63 нь нас барж, 35 нь хөгжлийн бэрхшээлтэй болж, 80 нь хөдөлмөрийн чадвараа алджээ.