Соёл урлаг, спортын аливаа түүхэн дурсгалт байгууламжийг нурааж, буулгах нь тийм ч таатай зүйл биш ажээ. Гэвч түүнийг нураахгүйгээр, дахин өөр зорилгоор ашиглаж болох бас нэгэн арга бий. Жишээлбэл, “MJA Studio” архитектурын компани Австралийн Субиако хотод орших Субиако Овал хөлбөмбөгийн стадионыг дахин өөр зориулалтаар ашиглах нэгэн овжин арга олжээ. Тэд уг стадионы гол хэсэгт аварга том давалгаат усан сан байгуулж, холимог цогцолбор болгохоор шийдсэн байна. Ингэснээр Суби Серф Парк хэмээх уг усан санг дэлхий дээрх хамгийн том бөгөөд зохиомол давалгаа бүхий усан сан болгож, серфингээр хичээллэдэг бүх насны тамирчид ур чадвараа хөгжүүлэн, дасгал хийх боломжийг олгох аж.

     “URBN SURF” группийн Wavegarden технологиор тоноглогдсон уг усан сан нь стадионы эзлэх газрын хэмжээнээс том бөгөөд үүнийг дүүргэх ус нь стадионы зүлгийг усалдаг усны хэмжээтэй адил юм байна. Энэхүү шинэ байгууламжид орон сууцны хэсэг, 3000 ам метр зах, 6500 ам метр худалдааны төв, Австралийн хөлбөмбөгийн түүх, соёлыг харуулсан байгууламжууд багтжээ. Түүнчлэн эргэн тойрон ногоон цэцэрлэгт хүрээлэн байгуулж, ногоон дээвэр хийхээр төлөвлөсөн байна.