Заримдаа ямар барилга бариулахаа маш сайн мэддэг, санаагаа сайтар ойлгуулж чаддаг үйлчлүүлэгчид тохиох нь гүйцэтгэгч талд амар байдаг. Энэ удаад хоорондоо уулзаж буй хоёр сарыг бэлгэдсэн барилгатай болохыг хүссэн нэгэн үйлчлүүлэгч таарсан юм. Тэрээр кофе шоп, галерей бүхий урлагийн төвтэй болохыг хүсч буйгаа илэрхийлсэн. Үйлчлүүлэгч чөлөөт цагаа өнгөрүүлж болох аятайхан, тохь тухтай мөртлөө сонирхолтой, романтик орчин бий болгохыг хүсчээ. Өөр нэгэн чухал зүйл бол тус сар хэлбэртэй хоёр барилгын нэгийг захиалагчид, нөгөөг нь түүний дүүд зориулан барих явдал байв. Мэдээж барилгад зориулах тэдний төсөв маш бага байжээ. Тиймээс гүйцэтгэгчид хямд төсөр материал ашиглан энгийн зүйлээр чамин барилга бүтээх даалгавар авсан хэрэг.