100 гаруй мянган хүн амтай Эрдэнэт хотын дулааны эрчим хүчний хэрэглээг 25-30 жилд найдвартай хангах боломжтой болжээ. 

Учир нь тус хотын дулааны цахилгаан станцын хүчин чадлыг 50 МВт-аар нэмэгдүүлэхээр болов. Ингэснээр станцын эрчим хүчний боловсруулалт 2,5-3 дахин нэмэгдэж, ОХУ-аас импортолж буй цахилгааны хэмжээ буурна. Улмаар зардал 41,3 төгрөгөөр буурч, 67,5 төгрөг болно хэмээн албаныхан мэдээлж байна. Станц жилд 7,5 тэрбум төгрөгийн ашигтай ажиллах төлөвтэй байна.

Нэг жилийн хугацаанд хэрэгжих уг төсөл нь 53,8 сая ам.долларын санхүүжилттэй. Үүний 85 хувийг БНХАУ-ын хөнгөлөлттэй зээлээр, үлдсэнийг нь Хөгжлийн банкнаас санхүүжүүлэхээр болсон. Түүнчлэн хөрөнгө оруулалтаа 7,5 жилд нөхөх тооцоотой байна. Энэ ажлыг гүйцэтгэх "Hunan Industtrial Equipment Installation" компанитай байгуулж буй гэрээнд Эрчим хүчний яамны удирдлагууд гарын үсэг зуржээ. 

Өргөтгөлийн хүрээнд тус станцад 50 МВт-ын турбогенертор шинээр суурилуулж, химийн ус цэвэрлэх тоног төхөөрөмжийг шинэчлэх аж.