Хотын захиргааны өндөр хар барилгаас нүүх талаар хэдэн жилийн өмнөөс яригдсан. Сонгинохайрхан дүүрэг, Ханын материалын комбинатын 9,2 га газарт хотын захиргааны шинэ цогцолбор барихаар төлөвлөж, төсөл хэрэгжүүлэгчээр БНСУ-ын "Хала гонсол" компани шалгарсан юм. Нийслэлийн ЗДТГ-аас 50,000 ам метр талбай бүхий барилгын зураг төсөл боловсруулж, газрыг шийдэн, техникийн нөхцөлийг нь ч бэлэн болгоод бүтээн байгуулалтыг эхлүүлэх гэтэл төсөл хэрэгжүүлэгч компани манай улсын эдийн засгийн байдал, валютын ханшийн өсөлтөөс шалтгаалан хөрөнгө оруулахаа хойшилуулсан гэнэ. Тус компани анх тохирсон үнээ нэмэх санал гаргасан бөгөөд түүнийг нь хотын удирдлагууд зөвшөөрөөгүй аж. Тиймээс концессын гэрээгээр хэрэгжүүлэх жагсаалтад оруулахаар төлөвлөж буй гэнэ. 

Цогцолборын тухайд нийслэлийн ИТХ, ЗДТГ, харъяа агентлагуудыг байрлуулах дөрвөн барилгаас бүрдсэн байхаар төлөвлөжээ. 2013 оны зургадугаар сард шавыг нь тавьж байв. "Халла гонсол" компани барилга, газар шорооны ажил гүйцэтгэх, тоног төхөөрөмж нийлүүлэх зэрэг бүх ажлыг багтаан 78,7 сая ам.доллараар шинэ барилга барих санал тавьжээ.