Улаанбаатар хотын гэр хорооллыг орон сууцжуулах ажлыг зохион байгуулахаар болж, Нийслэлийн төлөөлөгчдийн хурал гэр хорооллын дахин төлөвлөлтөд хамрагдах 24 байршил баталсан бөгөөд одоогийн байдлаар 16109 нэгж талбар бүхий 1547,8 га 75 хэсэгчилсэн талбайд үндэсний 34 аж ахуйн нэгж төсөл хэрэгжүүлж байгаа юм. Өөрөөр хэлбэл нэр бүхий 24 байршил барилга угсралтын 36 компани үйл ажиллагаа явуулж байна. Эдгээр компаниас ажлаа эхлээд хөрөнгө оруулалт байхгүйн улмаас түр зогссон ч байна, ажил нь эхлээгүй нь ч байна. Төлөвлөснөөр нь бол энэ жилийн гэр хорооллын дахин төлөвлөлтийн хүрээнд 2500 айлын орон сууц ашиглалтанд орох юм.
Засгийн газар, Хотын захиргаанаас гаргасан баримт бичгүүдэд тусгаснаар гэр хорооллын дахин төлөвлөлтийн хүрээнд баригдах төслийн инженерийн болон нийгмийн дэд бүтцийн барилга, байгууламжийн барилга угсралтын ажлыг улс, нийслэлийн төсөв, бондын хөрөнгө оруулалтаар барьж байгуулж байгаа бөгөөд 2013-2014 онд нийслэлийн төсвийн санхүүжилтээр 147,7 тэрбум төгрөгийн хөрөнгө оруулалт хийжээ. Харин 2015 онд 18,5 тэрбум төгрөгийн хөрөнгө оруулалт хийхээр батлажээ.
         Өнгөрсөн 2014 онд төсөл хэрэгжүүлэгч компаниуд газар чөлөөлөх, инженерийн шугам сүлжээ, хэсэгчилсэн ерөнхий төлөвлөгөө, зураг төсөл боловсруулах, ажлыг хийж гүйцэтгэсэн. Харин энэ оноос барилга угсралтын ажил эхлэх ёстой. Гэвч дээр батласан 18,5 тэрбум төгрөгийн хөрөнгө оруулалт бүтээн байгуулагчдад очоогүй учир ажлаа эхлүүлж чадахгүй байгаа аж. Хөрөнгийн асуудлыг шийдвэрлэх болсон тухайгаа барилгын компаниудад дуулгах, төслийг хэрэгжүүлэх явцад тулгарч буй хүндрэлтэй асуудлыг шийдвэрлэх, тэдний санал бодлыг сонсох үүднээс нийслэлийн Засаг дарга Э.Бат-Үүл төсөл хэрэгжүүлэгчдийн төлөөллийг өчигдөр хүлээн авч уулзлаа.
 
Улс төржүүлмээргүй байна

          Нийслэлийн засаг дарга ч төсөл хэрэгжүүлэгч аж ахуйн нэгжүүд ч энэ үгийн хэлж байсан юм.
Нийслэлийн Засаг дарга “Гэр хорооллын дахин төлөвлөлтийн төсөл маш хүндрэлтэй ажил. Гэвч та бүхнийг зориг гарган ажиллаж байгаад үнэхээр талархаж байна. Нийслэлээс та бүхний ажилд дэмжлэг үзүүлэх зорилгоор дэд бүтэц татах хөрөнгийг шийдвэрлэж, Нийслэлийн орон сууцны хөтөлбөрөөр дамжуулан барьсан орон сууцнуудыг борлуулахаар нийслэлийн нутгийн захиргааны байгууллагын албан хаагчдад орон сууцны урьдчилгааны 50 хувьд хөнгөлөлт үзүүлэх ажлыг хэрэгжүүлэх гэж байна. Харин бидний зүгээс үзүүлж буй дараагийн дэмжлэг бол та бүхний хүсэлтийг дагуу жилийн хүү багатай арилжааны банкны зээлийг олгохоор арилжааны банкуудтай ярилцаж байна. Энэ хэлэлцээрт аж ахуйн нэгжүүдийг оролцуулахад анхаарах асуудлыг нийслэлийн Засаг даргын Хот байгуулалт, хөрөнгө оруулалтын асуудал хариуцсан орлогч С.Очирбат хариуцна” гэлээ.

           Гэр хорооллын дахин төлөвлөлтийн төсөл хэрэгжүүлэгч аж ахуйн нэгжүүдэд жилийн 10-аас ихгүй хувийн хүүтэй зээлийг 3 жилийн хугацаатай олгох асуудлыг нийслэл Монголын банкуудын холбоо, арилжааны банкуудтай хамтран ярилцаж байгаа бөгөөд хамтарсан ажлын хэсэг гарахаар төлөвлөжээ. Ажлын хэсгийн бүрэлдэхүүнд нийслэл, Монголын банкуудын холбооны төлөөллөөс гадна төсөл хэрэгжүүлэгч аж ахуйн нэгжүүдийн байгуулсан холбооны удирдлагуудыг оролцуулахаар боллоо.
          Уулзалтын үеэр нийслэлийн Засаг дарга “Та бүхэн төсөл хэрэгжүүлэхээр ажиллаж байгаа нь нийслэлийн гэр хорооллын иргэдийн газрын үнэ цэнийг 3 жилийн өмнөхтэй харьцуулахад 3-4 дахин өсгөсөн. Энэ бол нийслэлээс уг төслийг санаачилж ажилласны хамгийн түрүүнд хүрсэн үр дүн. Тиймээс иргэдтэй тохиролцохдоо аль болох уян хатан нөхцөлтэй санал тавьж, өөрт байгаа ганц хөрөнгөө үнэлэж байгааг нь ойлгож харилцаарай” гэдгийг онцлон хэллээ. Үүний дараа төсөл хэрэгжүүлэгчдийн саналыг сонссон юм.
             Дахин  төлөвлөлтийн төсөл хэрэгжүүлэгч аж ахуйн нэгжийн удирдлагууд “Төслийн ажил хуваарийн дагуу явж байгаа. Зарим хүмүүсийн яриад байгаа шиг иргэдийн газрыг дарамталж аль эсвэл тулган шаардаж авсан асуудал нэг ч байхгүй. Бид аль болох тухайн иргэний хүссэн, гэхдээ харилцан ашигтай тохиролцоонд хүрээд явж байгаа. Гэтэл энэ ажлыг хөндлөнгийн зүгээс огт мэдэхгүй хүмүүс хэвлэл мэдээллийн байгууллагуудыг ашиглан иргэдэд ашиггүй санал тавьж газрыг нь авч байна, үнэ цэнэгүй болголоо гэх зэргээр худал мэдээлэл өгч иргэдийг турхирч байгаа нь ажил явуулахад маш их хүндрэл үүсгэж байна. УИХ-ын гишүүд газар дээр нь ирээд танилцдаг бид төслийнхөө явц, шаардлагатай асуудлаа хэлдэг. Гэтэл улс төрчид хэвлэлийн бага хурал хийж худал мэдээлэл тараан шоудаж байгаа нь харамсалтай. Харин нийслэлээс хүү багатай зээл олгох асуудлыг судалж байгаад таатай байна. Хугацаа алдалгүй ажил хэрэг болгохыг хүсье” гэлээ.
            Гэр хороолын дахин төлөвлөлтийн журамд тусгагдсаны дагуу Гэр хорооллын дахин төлөвлөлтийн төсөл хэрэгжүүлэгч нь тухайн газрын эзэнтэй харилцан тохиролцож гэрээ хийж ёстой. Үүний дагуу төсөл хэрэгжүүлэгч аж ахуйн нэгжүүд иргэдтэй орон сууц, үйлчилгээний талбай, автомашины зогсоолоор тохиролцож газраа чөлөөлөн түр орон сууцанд байршуулах эсвэл газраа шууд худалдаж авах зэргээр газар чөлөөлөлтийн ажлыг хэрэгжүүлж байна. Жишээ нь өнгөрсөн онд дахин төлөвлөлтийн төслийн хүрээнд Сонгинохайрхан дүүргийн 6 дугаар хороонд ашиглалтад орсон 168 айлын орон сууцанд амьдарч буй иргэн И.Цогзолмаа  198 м.кв үйлчилгээний барилгын газраа, 198 м.кв үйлчилгээний талбай+ 58 м.кв 2 өрөө байр+дулаан гаражаар тохиролцож сольсон байна. Төсөлд хамрагдсанаар зөвхөн ажил, үйлчилгээгээ явуулах талбайтай болохоос гадна өөрсдийн амьдрах орон сууцтай болсон байгаа юм.