Өмнөговь аймгийн Цогтцэций суманд баригдсан ус хангамж, ариутгах татуургын системийг хүлээлгэн өгөх арга хэмжээ өчигдөр болжээ.  Нээлтийн ажиллагаанд Засгийн газрын гишүүн, Барилга хот байгуулалтын сайд Д.Цогтбаатар, Роберт Орр, Мухаммед Сами Саид, Энтони Бэйкэр, тэргүүтэй Азийн хөгжлийн банкны захирлуудын зөвлөлийн гишүүд болон орон нутгийн удирдлагууд, GO204 төслийн нэгжийн захирал Б.Оюун, төслийн гүйцэтгэгч “Монинжбар” ХХК-ийн захирал Б.Баярсайхан нар оролцож, цаашид Азийн хөгжлийн банктай хамтран хэрэгжүүлэх төслийн талаар ярилцсан байна. Азийн хөгжлийн банкны буцалтгүй тусламж, Монголын засгийн газрын хөрөнгөөр Өмнөговь, Дорноговь аймгийн хот байгуулалт хилийн ойролцоо суурин газруудын хөгжлийн GO204-MON төслийн хүрээнд Өмнөговь аймгийн Цогтцэций суманд энэхүү төслийг амжилттай хэрэгжүүлжээ.

Азийн хөгжлийн банкны буцалтгүй тусламж 15 сая, Монгол улсын засгийн газраас 6,9 сая нийт 21,9 сая ам долларын хөрөнгө оруулалтаар уг төслийг хэрэгжүүлжээ. Уг төсөл нь цаашид өргөн цар хүрээг хамрах бөгөөд уул уурхайн үйл ажиллагаа төвлөрсөн стратегийн чухал ач холбогдол бүхий төв суурин газрууд болох Өмнөговь аймгийн Даланзадгад, Ханбогд, Цогтцэций, Гурвантэс болон, Дорноговь аймгийн Сайншанд, Замын-Үүд сумдыг хамрах юм байна. Төсөл хэрэгжсэнээр эхний ээлжинд Цогтцэций сумын төсвийн байгууллагууд цэвэр, бохир усны системид холбогдож байгаа юм байна. Тус сумын Ерөнхий боловсролын дунд сургууль цэвэр бохир усны холболтоо хийж дууссан бөгөөд сурагчид “хотын сургууль” шиг болж байгаад баяртай байгаагаа илэрхийлсэн байна.