Ерөнхий сайд Ч.Сайханбилэг сүүлийн үед олон сайхан амлалт өгч байгаагийн нэг нь долоо хоногийн турш 24 цагаар иргэдэд үйлчилдэг төрийн үйлчилгээг  бий болгох тухай мэдэгдэл юм.
      Түргэн тусламж, онцгой байдлын алба зэрэг 24 цаг тасралтгүй үүрэг гүйцэтгэдэг төрийн байгууллага олон байдаг ч татвар, гааль болон бүртгэлийн үйлчилгээ үзүүлдэг газрууд иргэдийн цаг хугацаа, уур бухимдлыг ихээр бардаг. Харин  энэ байдлыг нааштайгаар шийдэж, төрөөс иргэддээ үзүүлдэг 160 гаруй үйлчилгээг нэг цонхонд төвлөрүүлж, хүнд суртал, төвөг чирэгдэлгүй хөнгөн шуурхай болгох гэнэ.
      Эхний ээлжинд гаднаа олон машины зогсоол бүхий байр гаргаж, яам, агентлаг болон Нийслэлийн төрийн байгууллагуудын үйлчилгээг нэг дор төвлөрүүлэн  дараагийн шатанд захын дүүргүүдэд төрийн үйлчилгээ хүргэх салбаруудыг байгуулах замаар энэ асуудлыг шийдэх боломжтой хэмээн Ерөнхий сайд хэллээ. Түүнчлэн амралтын өдрүүд, ажлын бус цагаар үйлчлүүлж болох энэ үйлчилгээг нэвтрүүлэхэд шаардагдах хөрөнгө, урсгал зардлыг Засгийн газар тодорхой эх үүсвэрээс шийдэх боломжтойг  ч онцолсон.
      Харин энэ шийдлийн талаар хотын захирагч Э.Бат-Үүл хэлэхдээ: “Энэ бол зайлшгүй хэрэгжүүлэх шаардлагатай санаачлага. Ардчилсан төр иргэнээ захирдаг биш иргэндээ үйлчилдэг төр байх ёстой гэсэн үзэл санаа хэрэгжихэд чухал нөлөө үзүүлэх учраас дэмжиж байна. Иргэд замын түгжрэлд хотын төв рүү оролгүйгээр 24 цагаар үйлчлүүлж болох автомашины том зогсоолтой байр гаргах боломж бий. Хурдны зам дагуу байрласан  байранд байгаа байгууллагуудыг нүүлгэж, засвар хийхэд шаардагдах хөрөнгийн эх үүсвэрийг шийдвэрлэх шаардлагатай” гэлээ.
      Удахгүй төрөөс үзүүлдэг 160 гаруй үйлчилгээ нэг дор төвлөрч, иргэд нэг цонхноос бүх төрлийн үйлчилгээг ажил, амралтын аль ч цагт авах боломжтой болохнээ.