Одоо танилцуулж буй барилга нь 5 шооноос бүрдэх 2 давхар наранцэцэгийн хэлбэртэй  сууц юм.
       Байшингийн эзэн анх далайн эргийн газрыг худалдан авахдаа сэтгэлд бүрэн нийцсэн гайхалтай гэр бүлийн сууцтай болно гэж төлөвлөсөн ч хэд хэдэн бэрхшээл тулгарсан байна. Учир нь тухайн хэсэг газар хойгийн хамгийн хүчтэй салхины нөлөөнд байдаг, нарны цацраг ч бага тусдаг байжээ. Харин Cadaval & Sola-Моrаlеs уран барилгын компани барилгыг олон өнцөг бүхий шилэн нүүртэй төлөвлөснөөр эдгээр бэрхшээлийг шийдэж, нарны гэрлийг мэдрэх боломжийг бүрдүүлсэн байна.
       Аварга том наранцэцэгийн хэлбэртэй тус барилгын шалнаас тааз хүртэлх шилэн хана нь хүчтэй салхи, давстай усны түрлэгийг тэсвэрлэх хүнд даацын шилээр хийгдсэн бөгөөд бусад ханын барзгар гадаргуу нь салхины нөлөөг багасгадаг байна.
         Дээд давхарт байрлах  өрөөнүүдэд гоёмсог шатаар дамжин хүрэх ба  уг давхарт унтлагын өрөө, хоёр угаалгын өрөө болон зочны өрөө байрладаг. Харин нэгдүгээр давхарт гал тогоо, байшингийн урд хэсэгт жижиг усан сан бий.