Б.Нямтайшир захиралтай “Монгол алт” /МАК/ ХХК барилга бүтээн байгуулалтын салбарт тэр тусмаа барилгын материал үйлдвэрлэлийн чиглэлээр эрчимтэй үйл ажиллагаа явуулдаг.
Өнөөдөр тус компанийн  “Евро блок” хийт бетоны үйлдвэрийн нээлтийн ажиллагаа болсон юм. Нээлтийн ажиллагаанд Ерөнхийлөгчийн тамгын газрын дарга П.Цагаан, УИХ-ын гишүүн М.Энхболд, Барилга хот байгуулалтын сайд Д.Цогтбаатар, Монгол улсын ерөнхийлөгч асан Н.Багабанди болон албаны бусад хүмүүс оролцсон юм.

   Жилдээ 450-500 мянган м/куб хийт бетон үйлдвэрлэх хүчин чадал бүхий энэхүү үйлдвэр нь Герман, Голландын хамтарсан үйлдвэр бөгөөд евро стандартыг хангаж байгаагаараа бас нэгэн дэвшил болжээ. Гэхдээ эхний ээлжинд 270 мянган м/куб хийт бетоныг үйлдвэрлэх гэнэ.
Дотоодынхоо хэрэгцээг хангахаар боллоо

Энэ үеэр БХБ-ын сайд Д.Цогтбаатараас сэтгэгдэлийг нь сонслоо.

-Монгол улс жилдээ 650 мянган т/куб бетон блок гаднаас импортоор оруулж ирдэг гэсэн судалгаа байдаг. Шинээр нээгдэж байгаа энэ үйлдвэр эхний ээлжинд 270 мянган м/куб хөнгөн бетон үйлдвэрлэх хүчин чадалтай юм байна.  Энэ нь  энэ чиглэлийн үйлдвэрлэлд маш их ахиц гарч байгаа хэрэг л дээ. Мөн  “Дорны цас” ХХК  ийм хэмжээний бүтээгдэхүүн үйлдвэрлэж байгаа гээд бодохоор бид импортыг орлох хэмжээний бүтээгдэхүүн үйлдвэрлэж чадахаар боллоо. Өөрөөр хэлбэл бид хөнгөн бетоныг гаднаас оруулж ирэх шаардлагагүй боллоо гэж ойлгож болно. Энэ үйлдвэрийн бас нэгэн давуу тал бол уг евро нормыг хангасан өөрөөр хэлбэл европын технологийг Монголд нэвтрүүлж байна. Ингэснээр манай Монгол инженер, техникийн ажилчид европын техник технологийн хөгжлөөс суралцах төдийгүй, эзэмшиж өөрийн болгож чадаж байгаа юм. Мэдээж бүтээгдэхүүнээ гаднаас авахаа болихоор барилгын материалын үнэ буурна. Материалын үнэ буурахаар барилга орон сууцны үнэ ч буурах сайн талтай. Иймд орчин үеийн чанар стандартын чанарын шаардлага хангасан бүтээгдэхүүн үйлдвэрлэдэг цэвэр тохилог, хүн ажиллаж хөдөлмөрлөх нөхцөлийг хангасан үйлдвэр ашиглалтанд орж, ажлын байр шинээр бий болж байгаа нь талархууштай зүйл хэмээн бодож байна.

Цементийн үйлдвэрээ удахгүй нээнэ
МАК корпориацийн ерөнхийлөгч Б.Нямтайшираас үйлдвэрийнх нь талаар цөөн хэдэн асуултанд хариулт авсан юм. 

-МАК корпориаци барилгын салбарт идэвхтэй үйл ажиллагаа явуулсаар удаж буй. Шинээр ашиглалтанд орж байгаа үйлдвэрийнхээ талаар товчхон танилцуулахгүй юу?
-Европын болон дэлхийн хөгжилтэй улс орнууд хийт бетоныг орон сууцны болоод аж үйлдвэрийн барилгад түгээмэл ашигладаг.  Манай улсад ч багагүй ашиглаж байна. Гэхдээ бид дотоодын үйлдвэрлэлд чанартай бүтээгдхүү нийлүүлэхийг зорьсон үүднээс энэ үйлдвэрийг ашиглалтанд оруулж байна. Бүтээгдэхүүний давуу тал маш их. Тухайлбал: захиалагчийн хүссэн хэмжээгээшр зүсч болно. Хөнгөн цэвэрхэн, дулаан дамжуулах чадвар сайн, галд тэсвэртэй гэх мэт. Өндөр барилгад дүүргэгчээр ашиглахад хөнгөн учир нэн тохиромжтой. Өөрөөр хэлбэл Монголын цаг уурын нөхцөл тохирсон, чанартай бүтээгдэхүүнийг үйлдвэрлэх боломжтой боллоо, бид.
-Танай үйлдвэр цаашид ажиллах боловсон хүчнээ хэрхэн бэлдсэн бэ?
-Энэ үйлдвэрийг 2 жил гаруй хугацаанд Герман болон Голландын өндөр мэргэшсэн мэргэжилтнүүдийн удирдлаган доор угсарч, үйлдвэрлэлээ туршлаа. Энэ хугацаанд бид технологийн чиглэлийн мэргэжилтнүүдийг байнга сургаж, мэргэшүүлсэн. Тйим учраас энэ үйлдвэрт ажиллах боловсон хүчнүүд бэлэн болсон. Өөрсдөө бие даан авч явж чадна гэж би итгэж байгаа.
-Ийм том хэмжээний үйлдвэр Монголд ашиглалтанд орж байгаад иргэн хүний хувьд баяртай байна. Гэхдээ үйлдвэрлэлийн нэр төрлийг олшруулах боломж хэр байдаг бол?
-Бид судлаж байгаа. Дээврийн матеирал үйлдвэрлэж болох юм байна. Цонх болон хаалганы хүчитгэсэн блокуудыг үйлдвэрлэж болно. Шал үйлдвэрлэж болж байна. Энэ бүгдийг тооцож үйлдвэрээ нээсэн.  
-МАК зөвхөн энэ үйлдвэр бус цементийн нэлээд том үйлдвэрийг ашиглалтанд оруулахаар ажиллаж байгаа. Цементийнхээ үйлдвэрийн нээлтийг хэзээ хийхээр төлөвлөж байна вэ?
-Бид удахгүй ашиглалтанд оруулахаар хичээнгүйлэн ажиллаж байгаа. Тун удахгүй яг энэ үйлдвэрийг нээсэн шиг цементийнхээ үйлдвэрийн нээлтийг хийж, та бүгдийг урих болно.
 






Үйлдвэрийн дотоод хэсэг