Монгол улсын Ерөнхийлөгчийн санаачлагаар “Талын зам” буюу  “Алтанбулаг – Улаанбаатар – Замын-Үүд чиглэлийн 1000 км хурдны авто зам” барих төслийн ажлыг “Чингис Лэнд Девелопмент” Групп концессийн гэрээгээр хэрэгжүүлэх юм.Тус групп Засгийн газрын 399 дүгээр тогтоолын дагуу 2014 оны 3 дугаар сарын 9-ны өдөр Эдийн засгийн хөгжлийн яамтай концессийн гэрээ байгуулсан билээ. ОХУ болон БНХАУ төдийгүй Ази – Европийг холбосон уг хурдны замыг 3 жилийн хугацаанд барьж байгуулах зорилт тавин ажиллаж байгаа юм.
         Хурдны замын дагуу ирээдүйд шинэ суурьшлийн бүс, дагуул хот, суурин хөгжих бөгөөд улмаар олон мянган ажлын байр бий болох юм. Иймээс “Чингис Лэнд Девелопмент” группээс санаачлан “Талын зам ба хөгжил” сэдвийн хүрээнд аймаг, сум, дүүргийн ИТХ-ын дарга, Засаг дарга нар болон бусад албаны хүмүүсийг хамруулсан өргөн хэмжээний форумыг саяхан зохион байгуулжээ.  Энэхүү форумаар Алтанбулаг – Улаанбаатар – Замын-Үүд чиглэлийн хурдны авто зам” төслийн талаар дэлгэрэнгүй танилцуулга хийж, зам дагуу бий болох шинэ шинэ хот, суурин хаана байрлах, ямар онцлогтой байх, хэр хэмжээний ажлын байр бий болох, цаашид хэрхэн хөгжих, энэ төсөл дээр орон нутгийн зүгээс хэрхэн оролцох зэрэг олон асуудлыг хэлэлцэн зөвлөлдсөн байна. Мөн төсөл хэрэгжүүлэгч тал болох “Чингис Лэнд Девелопмент Групп” ХХК нь холбогдох аймаг сумдын засаг дарга нартай хамтран ажиллах Харилцан ойлголцлын санамж бичигт гарын үсэг зуржээ.