Энэ сарын 19-ны өдөр Чингис зочид буудлын хурлын танхимд Монголын барилгын инженерүүдийн холбооны ээлжит VIII их хурал болж өнгөрлөө. Тус хуралд Улаанбаатар хот болон орон нутгийн салбар холбоодын төлөөллөөс бүрдсэн 200-аад барилгын инженер хуран чуулсан юм.

Их хурлаар МБИХ-ны удирдлагууд өнгөрсөн хугацаанд хийж бүтээсэн ажлын тайлангаа танилцуулан, цаашдын хөгжлийн талаар хэлэлцлээ. Энэ жилийн их хурлын онцлох үйл явдал нь Инженерүүдийн холбооноос ерөнхийлөгчөө сонгох түүхэн үе тохиосон юм. Нийт гишүүдийн 59.9 хувийн саналаар Үндэсний бүтээн байгуулалтын корпрацын тэргүүн, дэд ерөнхийлөгч Ц.Эрдэнэбат сонгогдлоо.



Ц.Эрдэнэбат МБИХ-ны ерөнхийлөгчөөр сонгогдсоныхоо дараа хэлсэн үгэндээ “Их барилгад 30 жил зүтгэсэн жирийн нэгэн инженерт итгэл хүлээлгэж, Монголынхоо мянга мянган инженерүүдийг удирдаж ажиллах эрхэм үүрэг хүлээлгэсэн та бүхэндээ баярлалаа.

Миний бие ахмад, дунд, залуу үеийн инженерүүдийн зөв зүйтэй санал санаачлага, бодол, шүүмжлэлийг инженерүүдийн холбооны үйл ажиллагаанд тусгаж ажиллахаа хариуцлагатайгаар мэдэгдэж байна. Залуу инженерүүдийнхээ мэдлэг боловсролыг дээшлүүлэн улс орондоо үнэтэй хувь нэмэр оруулах чадварлаг боловсон хүчин бий болгоход анхаарч ажиллахаа илэрхийлж байна гэлээ.