Монголын эдийн засаг хямарч, их уусны дараа унтаад сэрсэн хүн шиг бүрсгэр өдрүүд үргэлжиж байгааг бид дор бүрнээ мэдэрч байна. Барилгын ажил ид өрнөж байх энэ улиралд ч ажлаа эхлүүлж амжаагүй байгаа компаниуд нэгээр тогтохгүй байна.
Гэвч эдийн засагт ганц нэг таатай үзүүлэлтүүд гарч эхлэжээ. Нүдэнд харагдаж, гарт баригдаж байгаа нь л гэхэд долларын ханш байна.  Оны эхний гурван сар тасралтгүй өгсч байсан долларын ханш сүүлийн хоёр сар дараалан буурав. 2015 оны нэгдүгээр улирлын сүүлийн сард 2 мянган төгрөг хүрч байсан америк доллар бага багаар буурсаар  “Найман шарга” зах дээр өнөөдөр доллар 1940 төгрөгтэй тэнцэж байгаа бол арилжааны банкууд нэг ам.долларыг 1957-1960 төгрөгөөр зарж байна. Харин Монгол банк 1948 төгрөг болохыг зарлажээ. Долларын ханш цаашдаа ч унах магадлал өндөр байгааг шинжээчид хэлж байсан.

 Мөн үүнээс дутахааргүй сайхан сонсогдох нэг мэдээ байгаа нь ирэх долоо хоногт Монголын эдийн засагт хагас тэрбум ам.доллар орж ирэх тухай юм.  Энэ нь Засгийн газрын батлагаагаар  Худалдаа хөгжлийн банк олон улсын зах зээлд 500 сая долларын бонд гаргасан. Энэ мөнгө ирэх долоо хоногт Монголын эдийн засагт орж ирэх бөгөөд ингэснээр манай гадаад валютын нөөц  хагас тэрбумаар өснө. 

Монгол банк сар бүрийн нэгний өдөр улсын гадаад валютын нөөцийг зарладаг. Тэгвэл энэ сарын нэгэнд манай гадаад валютын нөөц 1.3 тэрбум доллар болохыг мэдэгдсэн.

Мөн Засгийн газар Таван толгой, Оюу толгой зэрэг “толгойнуудаа” тун удахгүй хөдөлгөж, нэг шийдэлд хүрч болзошгүй байгаа талаар гадны хэвлэл мэдээллээр цацаж, хөрөнгө оруулалт хийж болох талаар зарим нэг нь эхнээсээ дуугарч эхлэжээ. Ямартай ч Монголын эдийн засаг уруудсан сөрөг үзүүлэлтээ цэглэж, бага боловч өгссөн үзүүлэлтүүдийг харуулж эхлэв. Энэ цаашид өгсөх эсвэл уруудах нь зөвхөн Засгийн газраас шалтгаална. Бидний эдийн засаг сэргэх “бүтүүхэн чимээ” сонсогдож байна.