Монголын хот байгуулалтын хөгжлийн танхимаас барилгын зургийн шинэ программыг нэвтрүүлж, хэрэгжүүлэх ажлыг зохион байгуулж байгаа. Энэ нь өдгөө манай барилгынхны өргөн хэрэглэдэг зураг төслийн хоёр хэмжээст программ “AutoCAD”-аас олон давуу талыг өөртөө шингээсэн  Allplan хэмээх программ хангамж бөгөөд уг программ дээр ажиллах чадвартай инженерүүдийг бэлтгэх зорилгоор анхны сургалтыг зохион байгуулсан байна. Уг сургалтанд хамрагдсан инженерүүд өнгөрсөн долоо хоногт БХБ-ын сайд Д.Цогтбаатараас сертификатаа гардан авсан.
       “Allplan” программ хангамж нь зураг төслийг эскизээс эхлэн барилга архитектурын зураг, материалын түүвэр, бүтээц болон бусад хорших инженерийн ажлын зургуудыг 3D орон зайд, нэгэн зэрэг, иж бүрнээр маш богино хугацаанд алдаагүй гүйцэтгэх боломжтой юм.
       Мөн барилгын материалын мэдээллийн бааз үүсгэдэг учир энэхүү программыг манай инженерүүд өргөн дэлгэр хэрэглээд эхлэвэл манай барилгын салбарт ямар төрлийн материал бүтээгдэхүүнийг хэрэглэж байгаа тухай нэгдсэн мэдээллийн сан үүсэх давуу талтай ажээ.