Сүүлийн үед барилгын зураг төслийн гурван хэмжээст программ Монголд нэвтрээд буй. Уг программыг нэвтрүүлэхэд гар бие оролцон ажиллаж  байгаа “Хот төлөвлөлтийн хүрээлэн” ХХК-ийн архитектор О.Цолмонтой ярилцлаа.

-Юуны өмнө энэ шинэ программын талаар танилцуулахгүй юу? Үүнийг хэрэглэснээр ямар давуу талыг олж авах боломжтой вэ?
-“Allplan” программ бол барилгын иж бүрэн зураг төсөл боловсруулахад зориулагдсан нарийвчлал өндөртэй, барилга, архитектур, хот байгуулалтын бүх мэргэжилтнүүд ашиглах боломжтой дэлхийг хамарсан томоохон сүлжээ бүхий программ хангамж юм. Одоо бидний нийтлэг ашигладаг хоёр хэмжээсээр зураг төсөл хийхэд зураг болон төсөв дээр алдаа их гарч, цаг хугацаа их алддаг.
Харин энэ программын хувьд гурван хэмжээсээр зурах боломжтой. Ингэснээр зураг зурж байх үед ямар алдаа гарч байгааг тэр дор нь архитектор, инженерүүд мэдэж болно. Мөн архитектор, инженерүүд нэгэн зэрэг зураг төсөл дээр сүлжээний орчинд ажиллах боломжтой байдаг тул цаг хугацаа хэмнэж, хөдөлмөрийг хөнгөвчлөх давуу талтай. Жишээ нь энэ программыг ашиглаж нэг сарын дотор 16 давхар барилгын иж бүрэн зураг төсөв гаргаж байсан туршлага байдаг. Мөн архитекторууд, инженерүүд өөрсдөө  материалын түүвэр хийх шаардлагагүй. Учир нь программ өөрөө автоматаар түүврээ гаргадаг тул материалын түүвэр ямар ч алдаагүй хийгддэг. Төсөвчин үүнийг үндэслэн мөн л зөрүүгүй тооцоо гаргах юм. Цаашилбал барилгын гүйцэтгэгч байгууллагуудад ч давуу талтай болох юм.
Манай орны барилгын норм дүрмийн ихэнх нь ОХУ-аас авсан байдаг. ОХУ-ын барилгын норм стандартууд энэ программын бүтээцийн хэсэгт суурилагдсан байдаг нь бас давуу тал юм. Тэгэхээр бид энэ программыг ашиглаж чадвал евро норм стандартыг давхар хангах нөхцөл бүрдэнэ гэж ойлгож болно.
-Уг программыг олон улсад хэр ашигладаг вэ?
-Дэлхийн 142 улсын 270,000 гаруй хэргэлэгчид “Allplan”  программыг ашиглаж байна. Ялангуяа Европийн  орнууд болон ОХУ-д түлхүү ашиглаж байгаа.
-Зураг төслийн программ яг гар утас өөрчлөгдөж байгаа шиг шинэчлэгдэж, шинээр нэвтэрч байх хэрэгтэй байх. Гэхдээ янз янзын программ нэвтрэх оролдлого хийж байсан ч амжилт олохгүй байсан нь бий. Танай программ нутагших боломж хэр өндөр байна вэ? Сонирхогчид олон байна уу?
-Тийм ээ. Аливаа шинэ программ сайжирч гарч ирдэг. Тиймээс олон мэргэжилтнүүд сонирхож байгаа. Шинэ зүйлийг хүлээж авахад тодорхой хугацаа хэрэгтэй байх. Манай компани саяхан энэ программын анхны сургалтыг зохион байгууллаа. Төгсөгчид сэтгэл өндөр байна. Бусад төрлийн программуудаас давуу тал ихтэй программ учир нутагших бүрэн боложтой гэж үзэж байна.
-Сонирхсон мэргэжилтнүүд энэ программын дэлгэрэнгүй мэдээллийг хаанаас авч болох вэ?
-https://www.facebook.com/allplanmn хаягаар программын дэлгэрэнгүй мэдээллийг авч болно.