Ерөнхий сайд Ч.Сайханбилэг Арабын Нэгдсэн Эмират улсын Дубай хотноо айлчилж, Монгол Улсын Засгийн газар, “Эрдэнэс Оюу толгой,” “Төркиз Хилл Резорсиз,” “Рио Тинто,” “Оюу толгой” ХХК-ууд Оюутолгой төслийн далд уурхайн бүтээн байгуулалт, санхүүжүүлтийн төлөвлөгөөний хэлэлцээрийг дуусган 5-р сарын 18-ны өдөр талууд  гэрээнд гарын үсэг зурсан тухай мэдээлэл энд долоо хоногийн олны анхаарал татсан сэдвийн нэг байлаа. 2013 оны 8-р сараас эхлэн түр зогсолт хийгээд байсан
зэс, алтны томоохон орд “Оюутолгой”-н өргөтгөлийн ажлыг эхлүүлэх энэхүү хэлэлцээрийг хийснээр Монголын эдийн засагт ямар өөрчлөлт орохыг шинжээчид үнэлэлт дүгнэлт өгч байгаа талаар олон улсын хэвлэл мэдээллийн хэрэгслээр эхнээсээ дүгнэх болов.
Тухайлбал: “Fitch Ratings” агентлагийн шинжээч Андрей Феннел “Уг хэлэлцээр Монголын эдийн засгийг тогтвортой байдлын замд нь оруулна. “Энэ гэрээ Монголын сул байгаа зээлжих зэрэглэлийг сайжруулж, эрс багассан гадаад валютын нөөцийг нэмэгдүүлэхээс гадна дахин санхүүжүүлэх эрсдэлүүдийг багасгана гэж бид найдаж байна” хэмээсэн тухай “МОНЦАМЭ” агентлаг мэдээлжээ.
Харин Азийн хөгжлийн банкнаас “Гэрээ байгуулснаар агшин зуурт ямар нэгэн үр нөлөө гарахгүй. “Оюутолгой” Монголын зөвлөлөөр батлуулахаар 5.4 тэрбум долларын өртөг бүхий гүний уурхайн техник эдийн засгийн үндэслэлийн судалгааг гаргаж өгөх ёстой. Монголын эдийн засаг энэ онд ердөө 3-хан хувиар өсөх хандлагатай байгаа бөгөөд гэрээ байгуулсан учир 2016 онд Монголын эдийн засгийг тав хүртэл хувиар өсгөж магадгүй. Хөгжингүй улсуудын хувьд ДНБ таван хувиар өсөхийг өндөр өсөлтөд тооцдог бол Монгол шиг 12 тэрбум доллараар эдийн засаг нь хэмжигддэг харьцангуй жижиг улсын хувьд ийм хувиар өсөх нь олдсон боломжуудыг алдсан гэсэн үг хэмээжээ.
Мөн хоёр тал маргаантай байсан асуудлаа шийдэж чадсан учир “Оюу толгой” компани улсын төсөвт 30 сая ам.долларын татвараа төлж, цаашид ажлын байр нэмэгдүүлэн, зургаан тэрбум ам.долларын хөрөнгө оруулалт хийснээр Монголын эдийн засагт дорвитой нөлөө үзүүлж гадаадын шинэ хөрөнгө оруулагчид орж ирэхэд түлхэц болно гэж төслийн удирдагчид тайлбарлаж байна.

Монгол Улсын Ерөнхий сайд Ч.Сайханбилэг гарын үсэг зурах ёслолын арга хэмжээний үеэр “Оюу толгой”-гоор зогсохгүй Таван толгойн төслөө хөдөлгөх шийдвэрийг ойрын үед гаргана гэж төлөвлөж байна. Монголд орж ирэх гадаадын хөрөнгө оруулалтыг татахын тулд манай Засгийн газар цаашид тууштай ажиллах болно” хэмээсэн тухай албаны эх сурвалжууд хэлж байгаа билээ.
Дээрх бүхий l эх сурвалжууд Монголын эдийн засагт энэ ондоо биш гэхэд ирэх жилээс нааштай хандлагууд гарах тухай ярьж байна. Нийт эдийн засаг сэргэхэд барилгын салбарт ч мөн өгөөжөө өгөх нь гарцаагүй. Харин энэ үр өгөөжийг хэрхэн яаж ашиглах нь Төрийн ухаалаг зохицуулалттай холбоотой.
Ерөнхий сайд болоод түүнийг дагалдсан явсан холбогдох албан тушаалтнууд нөгөөдөр буюу энэ долоо хоногийн баасан гарагт Дубайгаас эх орондоо ирнэ. Тэр үед энэхүү гэрээний талаар илүү дэлгэрэнгүй мэдээллийг хүргэх болно.