Улаанбаатар хотын автомашины худалдааг нэг цэгт төвлөрүүлэх зорилгоор “Авто худалдааны цогцолбор”-ыг байгуулж байгаа. Өнгөрсөн жилийн аравдугаар сард эхний ээлжээ ашиглалтад оруулах байсан ч амжаагүй юм.
      Одоогоор нийслэл хотын хоёр зуу гаруй байршил, нийтийн эзэмшлийн зам талбайд автомашин худалдаалж байна. Тэгвэл “Авто худалдааны цогцолбор” ашиглалтанд орсноор Улаанбаатар хотын 25 га талбайд буюу “Да хүрээ” захыг тойрсон автомашин худалдаалдаг техникийн есөн зах, дээр дурдсан хоёр зуун цэг ийшээ нүүн ирж нэг дор төвлөрөх юм. Уг цогцолбор нийт 130 га талбайг хамрах бөгөөд энэ нь “Нарантуул” олон улсын худалдааны төвөөс долоо дахин том талбайд баригдаж байгаа гэсэн үг.
     Тус цогцолбор нь автомашины сэлбэг, хэрэгслийн 285 павильон, 11324 суудлын болон жийп автомашины худалдаа, 1191 автобус, хүнд даацын автомашины худалдаа эрхлэх талбайтай байх аж. Түүнчлэн авто экспо явагдах цогцолборын нэг барилга, үйлчилгээ, оффисын 14 барилга, 42 км автозам, 8.7 га талбайд явган хүний зам, үйлчлүүлэгчдийн 1438 автомашины зогсоол, 36.7 га талбайд цэцэрлэгт хүрээлэн, ногоон байгууламж, 4.4 га талбайд автомашины туршилтын талбай байхаар төлөвлөжээ. Мөн “Авто худалдааны цогцолбор”-т хотын төвийн замын ачааллыг бууруулах зорилготой хөдөө орон нутгаас орж ирэх автозамын сүлжээг шинээр төлөвлөж байгаа гэнэ. Эхний ээлжинд дөрвөн гол талбайн 6375 автомашины зогсоол ашиглалтанд орох юм байна. Зогсоолыг япон автомашины, хуучин болон улсын дугаартай автомашины, солонгос болон европ автомашины, АНУ-аас орж ирдэг зөв талдаа рультэй автомашин гэсэн дөрвөн хэсэгт төрөлжүүлэн ангилж байрлуулах аж.

      Одоогоор “Авто худалдааны цогцолбор” орчимд нийтийн тээврийн хөдөлгөөний чиглэл байхгүй учир 22-ын товчооноос 1.3 км зайд нийтийн тээврийн эцсийн зогсоол байршуулах боломжтой гэж үзэж байна. Нийт таван жилийн хугацаанд “Авто худалдааны цогцолбор”-ыг бүрэн ашиглалтад оруулахаар төлөвлөж байгаа бөгөөд  энэ жилийн Улсын баяр наадмаас өмнө 14 мянган автомашины зогсоол бүхий газрыг хатуу хучилттай болгож, ашиглалтад оруулах гэнэ. Эдгээр зогсоолыг аж ахуйн нэгж, иргэдэд тодорхой хэмжээний төлбөртэйгээр эзэмшүүлнэ. Тухайлбал, зогсоолын хэмжээнээс шалтгаалан иргэд, аж ахуйн нэгжүүдэд худалдах үнэ нь 4-9 сая төгрөг байх бөгөөд уг зогсоолоос олсон орлогоор бусад бүтээн байгуулалтын ажлыг эхлүүлэхээр төлөвлөжээ. “Авто худалдааны цогцолбор”-ын зогсоолын борлуулалт одоогоор 30 гаруй хувьтай байгаа гэнэ.    
      Эхний ээлжийн бүтээн байгуулалтын төсөв нь 20 тэрбум төгрөг бөгөөд үүнд 22 цайны газар, таван нийтийн бие засах газар, даатгал, үйлчилгээний нийт 40 гаруй түр байгууламжийг байгуулах юм байна. Түүнчлэн автомашины угаалга, дулаан граж, тос тосолгоо, дугуй засварын газруудыг ч байгуулж ажиллахаар хамтран ажиллах, үйлчилгээ явуулах сонирхолтой компани, хувь хүмүүстэй гэрээ хийж байгаа аж. “Авто худалдааны цогцолбор”-ын нийт талбайд утасгүй интернэтийн сүлжээг суурилуулсан бөгөөд хяналтын камер байршуулах юм байна. Мөн автомашины худалдаанаас гадна дагалдах сэлбэг, хэрэгслийг борлуулдаг томоохон зах, жижиг цэгүүдийг төвлөрүүлж, мянга гаруй чингэлэг байршуулах бөгөөд “Өгөөмөр”, “Да хүрээ” зэрэг захуудын түрээсийн үнээс хоёр дахин хямд үнээр түрээслүүлэх гэнэ. Иргэдэд зориулсан үйлчилгээг ойртуулах үүднээс Авто тээврийн үндэсний төв тус цогцолборт байрлах юм. Авто тээврийн газарт зориулж хоёр га газрыг гаргаж өгч байгаа аж. Тус төв уг цогцолборт байрласнаар автомашины бүртгэл, гаалийн бүрдүүлэлт зэргийг нэг цэгийн үйлчилгээгээр хийх гэнэ.

- “Авто худалдааны цоцгцолбор” доторх зогсоолыг үнийг хэрхэн тогтоосон бэ?
- 25 жил автомашин худалдаалсан хүн өнөөдөр ахиад л түрээс төлөөд зогсож байгаа. Тэгвэл 3-3.5 жил төлөх түрээсийнхээ үнээр энд өөрийн гэсэн өмчтэй болчихно. Нэг машины зогсоолын өөрийн өртөг нь 12 сая төгрөг байгаа. Харин бид дөрвөн саяар борлуулж байна.

- Энэхүү худалдан авсан зогсоолоо барьцаалан зээл авах боломжтой гэж байсан?
- Зогсоолоо банкуудад барьцаанд тавьж зээл авах боломжтой. Арилжааны банкууд манайд зээлийн бүтээгдэхүүн гаргасан. Заавал бэлэн мөнгөгүйгээр автомашиныхаа бизнесийг эхлэх боломжтой болно. Мөн Зээлийн батлан даалтын сангийн зүгээс зээлийн 60 хүртэлх хувьд нь батлан даалт гаргаж өгөх боломжтой гэдгээ илэрхийлсэн.

- Бусад бүтээн байгуулалтын ажил хэрхэн хийгдэх вэ?
- Энд 15 барилга баригдана. Үүнээс 12 барилга нь хувийн хэвшлийн хөрөнгө оруулалтаар баригдах юм. Уг газрыг дуудлага худалдаагаар зарахаас есөн газрыг гурав орчим тэрбум төгрөгөөр худалдаалсан.

-Цахилгааны асуудлыг бүрэн шийдвэрлэж чадсан уу?
- “Авто худалдааны цогцолбор”-ын цахилгааныг шийдвэрлэсэн. 10 кв.т-ын цахилгаан дамжуулах агаарын, 04-ийн кабель шугамаар 9 ерөнхий самбарыг тэжээж байна. Далд шугамаар тэжээлийг өгөх замаар цахилгааныг шийдэж байгаа гэсэн үг. Үүнээс гадна 210 гэрэлтүүлэгч прожекторыг босгоно. Ингэхээр “Авто худалдааны цогцолбор”-ын цахилгаан эрчим хүчийг найдвартай шийдсэн гэж ойлгож болно.

- Бие засах газрын асуудлыг хэрхэн шийдвэрлэж байна вэ?
- Эрэгтэй, эмэгтэй гэсэн 7 бие засах газар хийсэн. Шугамыг төвийн магистралаас тусдаа хийж байгаа. Бохирыг нэгдсэн системээр зөөвөрлөх байдлаар эхний ээлжинд шийдэж байна.  Ойрын 2 жилийн хугацаанд цахилгаан эрчим, дэд бүтэц зэрэг инженерийн асуудлыг шийдвэрлэнэ гэж тооцоолсон.
 
Одоогийн байдлаар тус цогцолборын дөрвөн талбайн гуравт нь асфальтаа дэвссэн байгаа юм. Мөн 22-ын товчоо хүрэх автозамаас баруун урд зүгт байрлах тус цогцолбор руу хүрэх 1.7 км автозамын ажлыг гүйцэтгэх компани өнөөдөр шалгарч байгаа гэнэ. Ирэх сарын дунд үе гэхэд уг замын ажлыг хийж дуусгахаар төлөвлөсөн юм байна.