Төв Азийн эртний нүүдэлчин овог аймгуудын уламжлалт сууц болох эсгий гэрийн түүх нь манай он тооллоос 500 зуун жилийн тэртээ үеэс буюу эсгий хийж гэрээ бүрдэг болсон цагаас эхлэдэг талаар түүх судлаачид дурьджээ. Иймд Монгол гэрийн хөгжил нь 2500-3000 жилийн түүхтэй  бөгөөд 13-р зууны үеийн монгол гэр  орчин үеийн монгол гэртэй нэлээн төстэй болж ирсэн байна.  Хөнгөн, авсаархан, удаан эдлэгддэг, зөөвөрлөхөд хялбар, архитектурын өвөрмөц шийдэлтэй гээд Монгол гэрийн давуу талыг тоочвол маш их.
       Гэтэл Монгол туургатны уламжлалт энэхүү сууцнаас санаа авсан зөөврийн сууцыг гадаадад бүтээж,  7500 доллараар зарж байгаа аж. Шотландын Trakke компанийг үндэслэгч Alec Farmer болон түүний найз дизайнер Uula Jero нар энэхүү зөөврийн сууцыг бүтээсэн бөгөөд Jero хэмээн нэрлэсэн байна.
       Уг зөөврийн сууц нь 4 метр диаметртэй, 1,2-2,6 метр өндөртэй, 110 орчим кг жинтэй, хурааж багцалвал 1,2х0,8х0,5 метрийн хэмжээтэй болдог аж. Мөн бүрдэл хэсгүүдийг ус чийгэнд тэсвэртэй наамал банз, зэвэрдэггүй ган төмөр, полиэфирийн мяндас, ус нэвтэрдэггүй зотон даавуу зэргээр хийсэн байна. Аялал зугаалгаар явах үед хурааж багцлаад машиныхаа арын тэвшинд хийгээд явах боломжтой энэхүү гэр сууцыг барууныхан ихээхэн сонирхон хэрэглэх болсон бөгөөд 4500 евро буюу 7480 долларын үнээр зарагддаг ажээ. 

Эх сурвалж: http://www.wired.com