УСУГ-ын дарга С.Үнэн хэвлэлийнхэнд мэдээллээ. Төв цэвэрлэх байгууламжид яаралтай засвар хийхгүй бол энэ зун нийслэлчүүд бохироо гадагшлуулах аргагүйд хүрэх аюул нүүрлээд байна. Тиймээс ойрын өдрүүдэд төв цэвэрлэх байгууламжийн аэротенкийн хэсгийг яаралтай нөхөх ажлыг эхлүүлэх шаардлагатай байгааг хэлсэн юм.

Анх 1979, 1985 онд ашиглалтад оруулсан цагаас хойш огт шинэчлэл хийгээгүйгээс цооролт үүсч, цооролтын хэмжээ ихэссэн.
Ингэснээр одоогийн 65 хувийн цэвэрлэгээний хувь хэмжээ улам багасна. Энэ чигээрээ явбал ирэх жил гэхэд нийслэлчүүд хэрэглэсэн бохир усаа ариутгах байгууламжгүй болох аюул нүүрлэжээ.

Энэ удаагийн засварыг Засгийн газар, нийслэлийнхний гарыг харалгүйгээр яаралтай эхлүүлэхээр шийдээд байна. Засварлахын тулд гурав хоногийн хугацаанд иргэдийн хэрэглээний усыг хязгаарлах, эсвэл нийслэлчүүдийн хэрэглэсэн усыг цэвэрлэхгүй шууд Туул гол руу асгах гэсэн сонголт дээр тулаад байна. Иргэдийн усыг хязгаарлах нь боломжгүй асуудал учраас бохир усыг шууд Туул гол руу асгахыг сонгох нь асуудал болоод байгааг дурьдсан юм.  Ямартай ч Цэвэрлэх байгууламжийн засварыг өнөөдөр, эсвэл маргаашнаас эхлүүлнэ.