Орон сууц дулаан тохилог байхаас гадна ногоон байгууламжаар нь түүний үнэ цэнийг тодорхойлдог болсон
“Санхеро” ХХК-ний үүсгэн байгуулагч, гүйцэтгэх захирал Д. Даваабаяртай ярилцлаа.
-Юуны өмнө та өөрийгөө танилцуулахгүй юу?
Намайг Доржхандийн Даваабаяр гэдэг. Барилгын салбарт ажиллаад 10 гаруй жилийн нүүр үзэж байна. Солонгос улсад барилгын чиглэлээр ажиллаж ирээд 2008 онд төмөр бетон бүтээц, угсралтын “Санхеро” ХХК-г үүсгэн байгуулсан. Энэ жилээс бие дааж анхныхаа бүрэн хэмжээний цогцолбор хотхоныг барих ажилдаа ороод байна. Гачууртын эцэст 8 га газарт байгалийн үзэсгэлэнт цогцолборт, 1000 гаруй мод тарьж, ногоон байгууламжийг дээд зэргээр бүрдүүлсэн эко орчинтой “ Гачуурт Гарден” төслийг эхлүүлээд явж байгаа.
- “ Гачуурт Гарден” төсөл барилга барихтайгаа зэрэгцээд ногоон байгууламж, модоо тариад эхэлсэн байна. Ихэнхи барилгын компаниуд барилгын ажил дуусахаар модоо суулгадаг. Танай компанийн хувьд ногоон байгууламжаа урьтал болгож байгаа нь сайхан санагдлаа.
Бид энэхүү төслөө нэрнээс нь эхлээд л “Гарден” гэж нэрлэсэн нь их утга учиртай. Нийгэм хөгжихийн хэрээр хүний хэрэгцээ шаардлага ч дагаад өөрчлөгдөж байдаг. Шинэчлэл хамгийн их явагддаг салбар бол барилгын салбар юм. Өнөөгийн Монголын барилгын салбар бизнесийн аргачлалаа өөрчлөх цаг болсон.
Өнөөдөр байр, орон сууц дулаан тохилог байхаас гадна хамгийн гол нь гадна тохижилт, ногоон байгууламжаар нь түүний үнэ цэнийг тодорхойлдог болсон байна. Одоогоос хэдэн жилийн өмнө орон сууцны эрэлт их байхад хүмүүс орон сууц захиалж, худалдан авахдаа халаалт сайн уу, сантехник хэр вэ гэдэг байсан бол одоо гадна тохижилт, хүүхдийн тоглоомын талбай, ногоон байгууламж чинь сайн төлөвлөгдсөн үү гэж асуух нь элбэг болжээ. Нэг ёсондоо орон сууцны худалдан авалт хийхэд энэ шалгуур үзүүлэлт борлуултанд нөлөөлж байна гэсэн үг. Тэр ч утгаараа манай төсөл хотхоныхоо ногоон байгууламжинд барилгынхаа ажилтай зэрэг анхаарал хандуулаад явж байгаа юм.
Манай “ Гачуурт Гарден” хотхон нь нийт 80 айлын дан хаусаас бүрдэнэ. Одоогоор эхний ээлжийн 5 байшингийн суурийг цутгахтайгаа зэрэгцээд л модоо суулгаад эхэлсэн. Учир нь мод суулгах улирал гэж байдаг. Манайх ногоон байгууламж тал дээрээ мэргэжлийн ландшафтийн “Элит гарден” компанитай хамтран ажиллаж байна. Зарим компани барилга барьж дуусаад улсын комисс хүлээж авах дөхөхөөр ургах үгүй нь мэдэгдэхгүй хэдэн мод худалдаж аваад өөрсдөө суулгаж орхидог. Үүнийг ногоон байгууламж тохижилтын ажил гэж хэлэхэд хэцүү. Энэ нь тухайн мод ургах үгүй нь мэдэгдэхгүй, цаашид арчилгаа усалгааг нь хийх хүнгүй үлдээж байгаа хэрэг юм. Мод тарих гэдэг зүгээр нэг шороонд суулгаад болчихдог зүйл биш. Иймд иргэд албан байгууллагууд өөрийн эзэмшил газар дээрээ байшингаа барихтайгаа зэрэгцээд мод, ногоон байгууламжийн ажлаа эхлүүлэх хэрэгтэй.
- Барилгын компаниуд зөвхөн ашиг хонжоо харж гадна тохижилт зэргийг төдийлөн анхаардаггүй. Орчин үед хүмүүс зөвхөн барилгын өнгө үзэмжийг харалгүйгээр орчин нөхцөлийг түлхүү харж авдаг болсон . Энэ тал дээр таны бодол ?
Яг зөв. Хүн өөрийн амьдарч буй орон гэртээ амар амгалан байхыг хүсдэг. Амралтын өдрүүдэд сайхан амарч тухлахын тулд цаг зав, бензин тосоо гарздан заавал хотоос гарч явах биш, өдөр тутам өөрийн орон гэртээ тав тухыг мэдрэхийг илүүд үздэг. Тиймээс тэдэнд тохирсон орчин нөхцөлийг бүрдүүлж өгөх хэрэгтэй.
Манай хорооллын хувьд маш олон давуу талтай. Гадна цэцэрлэгжилт, мах шарах талбай, машины граж гэх мэтчилэн бүх зүйлийг европ стандартаар зөв төлөвлөж өгсөн.
Эхний ээлжинд бид хэт ашиг харахыг хүсээгүй. Захиалагчдынхаа амьдрах таатай орчныг дээд зэргээр бүрдүүлэх тал дээр ихээхэн анхаарч байна. Энэ нь бидэнд шууд ашиг тусаа өгөхгүй ч алсдаа илүү цэнээ хадгалсан алсыг харсан зөв шийдвэр байх болно гэдэгт итгэлтэй байдаг. Нэмж хэлэхэд хуучин шиг хэдэн метр кв бариад нүд хуурсан ногоон байгууламж зэрэгт иргэд ач холбогдол өгөхөө больсон. Барилга барихаасаа өмнө хэрэглэгчийхээ хүсэл шаардлагыг судалж, орчин нөхцөлд нь онцгой анхаарч бүтээн байгуулалт хийхгүй бол тухайн барилга жил ирэх тусам үнэ цэнэ нь нэмэгдэх биш, үнэ цэнээ алдсаар байдаг. Иймд барилгын салбарт сэтгэлгээний шинэчлэл хэрэгтэй.
- Тэгэхээр таны хэлснээр ногоон байгууламжаа гайхалтай сайхан цогцлоосон барилга бол жил ирэх тусам үнэ цэнэ нь өсч байдаг гэсэн үг үү?
Ямар ч барилга он жил өнгөрөх тусам их бага хэмжээгээр элэгдэж байдаг нь үнэн. Сантехник, цахилгаан, дотор засал чимэглэлээс эхлээд л. Харин ногоон байгууламж, цэцэрлэгжүүлэлтийн ажил бол жил ирэх тусам илүү сайхан өнгө засч байдаг. Энэ жил жижигхэн байсан мод ирэх жил илүү өндөр, саглагар сайхан болдог шүү дээ. Тэгээд л жил өнгөрөх тусам хэлбэржүүлэлтийг нь сайхан хийгээд явахад улам л өнгө үзэмжтэй болж хувирдаг. Алсдаа иргэд хотын төвд амьдрахаас илүүтэйгээр эко орчинтой, хотоос зайдуу байгальтайгаа ойр амьдрахыг илүүд үздэг болно.
- Та барилгын үнэ цэнийн талаар ярилаа. Иргэд ч гэсэн үнэ цэнээ хэзээд хадгалах орон сууц худалдан авахын тулд барилгын компаниудад тавих шаардлагаа өндөрсгөх хэрэгтэй болов уу?
Тэгэлгүй яахав. Одоо үед барилгын чанартайгаа зэрэгцээд л гадна орчны ногоон байгууламж цэцэрлэгжилтийг онцгойлон үздэг болж байна. Цаашдаа энэ нь хэрэгцээ шаардлага болон ирэх байх. Иймд иргэд ч гэлтгүй салбарын удирдлагууд ногоон байгууламж, орчин нөхцөлд тавих шаардлагаа өндөржүүлэхгүй бол Монгол улс зай талбайгүй дүнсийсэн саарал хот хэвээр байх болно.
Би өөрөө барилгын салбарт ажиллаж байгаа аж ахуйн нэгжийг удирддаг хүний хувьд энэ салбар маань хот тохижилт ногоон байгууламж, ландшафтын төлөвлөлтийг төдийлөн чухалчлан авч үзэлгүй өнөөдрийг хүрсэн бол одооноос заавал анхаарах ёстой юм байна гэдгийг ойлгож эхлэж байна. Мөн хувь хүнийхээ хувьд бодож явдаг зүйл байдаг юм. Төр засгаас өчнөөн олон тэрбумаар цэцэг тариад л тэр нь ганц зуны настай ажил болоод дуусч байгаад би их харамсдаг.
Түүний оронд барилга орон сууцыг дагаж хөгждөг Ландшафт, хот цэцэрлэгжүүлэлтийг дэмжихийн тулд нийгмийн хариуцлагаа ухамсарлан ажиллаж байгаа барилгын компаниудыг төрөөс бодлогын хэмжээнд дэмжих нь энэ салбарыг хөгжүүлэх хамгийн зөв зүйтэй алхам гэж боддог. Гадна тохижилт, ландшафтандаа онцгой анхааран ажиллаж байгаа барилгын компаниудаа багахан дэмжихэд түүнийг дагасан мэргэжлийн ландшафтын компаниуд ч тогтмол ажилтай байж үүнийхээ хэрээр нийслэл хотын өнгө үзэмж сайжирч, өвлийн цагт ихэсдэг утаа униар ч тодорхой хэмжээгээр буурах нөхцөл бүрдэх юм.
