“Улаанбаатар дулаан сүлжээ” ТӨХК-иас жил бүрийн энэ үед буюу зуны саруудад орон сууцны айлуудын халуун усыг хэсэгчлэн хааж засвар шинэчлэл хийдэг. Өмнөх жилүүдэд айлуудын халуун усыг 10-15 хоног хязгаарлаж засвар хийдэг байсан бол энэ удаад цөөнгүй газруудад халуун усыг гурван сарын турш хаахаар болжээ. 

Тодруулбал, "Маршал таун", "Олимп" хороолол, "Ривер гарден" хотхон, 40, 50 мянгатын орон сууц, "Сүнжин гранд" буудал зэрэг газруудын ойролцоох байруудын халуун усыг энэ сарын 18-наас ирэх наймдугаар сарын 25 хүртэл буюу гурван сарын хугацаагаар хаахаар төлөвлөсөн байна. Ямар учраас ийнхүү урт хугацаагаар халуун ус хязгаарлах болсон талаар тус  “Улаанбаатар дулаан сүлжээ” ТӨХК-ийн ерөнхий инженер Т.Алтангэрэлээс тодрууллаа.

-Орон сууцуудын халуун усыг энэ долоо хоногоос хязгаарлаж эхэллээ. Цөөнгүй газруудад гурван сарын хугацаагаар халуун ус хаахаар болсон нь иргэдийн бухимдлыг багагүй төрүүлээд байгаа гэнэ. Энэ талаар мэдээлэл өгнө үү?

-Манай улсын тухайд халуун ус, халаалтыг нэг шугамаар хэрэглэгчдэд хүргэдэг. Өвлийн улиралд айлуудыг халаалт, халуун усыг доголдуулахгүй, элдэв эрсдэл үүсгэхгүйн тулд жил бүр шугамд засвар хийдэг. Нийт 379 километр шугамыг засварлахын тулд арван хэсэг болгон хэсэгчлэн хувааж улмаар халуун усыг нь хааж засвар хийдэг. Харин энэ жил улсын төсвийн хөрөнгөөр дулааны өргөтгөлийн том шинэчлэл хийгдэж байгаа. Үүнтэй холбоотойгоор дараах газруудын халуун усыг гурван сар орчмын хугацаанд хязгаарлахаас өөр арга байхгүй.

-Оршин суугчид багагүй гомдол ирүүлж байгаа гэсэн. Хэрхэн энэ асуудлыг шийдвэрлэж байгаа вэ?

-Иргэдэд халуун ус хязгаарлаж ямар засвар хэрхэн хийх талаар тайлбарлан аль болох ойлголцож байна даа.

-Дээрх газруудаас бусад байршилд халуун усыг арав орчим хоног л хязгаарлах уу?

-Тэгнэ.