Ази Номхон далайн улс орнуудыг улс төр, эдийн засаг, соёл, шинжлэх ухааны чиглэлээр Европт сурталчилан таниулдаг хамгийн том арга хэмжээ болох “Ази номхон далайн долоо хоногууд” арга хэмжээ энэ сарын 18-25-ний өдрүүдэд “Ухаалаг хот” сэдвийн хүрээнд зохиогджээ. ХБНГУ-ын нийслэл Берлин хотноо болсон энэхүү арга хэмжээнд Барилга хот байгуулалтын дэд сайд Г.Байгалмаа, Монголын хотуудын холбооны гүйцэтгэх захирал Б.Одбаяр нар оролцож нээлтийн ёслолд үг хэлсэн юм. Арга хэмжээний оролцогч орон бүр зохион байгуулж буй оронд эх орноо төлөөлөн суурьшиж байгаа Элчин сайдын яамны өдрийг зохион байгуулдаг уламжлалтай бөгөөд Монголын элчин сайдын яамны өдөр өнгөрсөн долоо хоногийн мягмар гарагт болж өнгөрчээ. Тэд энэхүү өдрөөрөө “Бизнесийн өдөрлөг”-ийг зохион байгуулсан байна. Бизнес өдөрлөгт Монголоос уригдан очсон зочид илтгэл тавьж оролцжээ.


   Ази номхон далайн улс орнуудын энэхүү уулзалт 1197 оноос хойш тогтмол зохиогдож байгаа бөгөөд энэ үеэр уулзалтанд оролцогч орнуудын тодорхой албан тушаалтнууд Азийн хотуудад тохиолдож байгаа төвлөрөл, дэд бүтцийн хөгжил, цэвэр ус, эрчим хүчний хангамжийн талаар илтгэл тавьж, санал бодлоо солилцдог байна. Энэ удаагийн арга хэмжээнд БХБ-ын дэд сайд Г.Байгалмаа болон нийслэлийн Засаг даргын хот байгуулалт, хөрөнгө оруулалт хариуцсан орлогч С.Очирбат нар оролцоод өчигдөр эх орондоо иржээ.