Нийслэлийн нутаг дэвсгэрт үйл ажиллагаа явуулж буй аж ахуйн нэгж, байгууллагуудын ажлын шинэ санал санаачилгыг дэмжих, нийгмийн хариуцлагыг өндөрсгөх, тохижилт бүтээн байгуулалт, хог хаягдал, цэвэрлэгээний менежментийг сайжруулах, хотын өнгө үзэмжийг дээшлүүлэх замаар иргэдийн ая тухтай орчинд ажиллаж, амьдрах нөхцлийг бүрдүүлэх зорилготой 2015 оны шилдэг тохижилт, ногоон байгууламжтай, цэмцгэр байгууллага аж ахуйн нэгж шалгаруулах болзолт уралдааныг зарлаад байгаа билээ.
          Энэ ажлын хүрээнд нийслэлийн хэмжээнд байгуулагдсан 51 ажлын хэсгээс аж ахуйн нэгжүүдийн цэвэрлэгээ тохижилтод хяналт тавьж эхэлжээ. Эхний ээлжинд аж ахуйн нэгжүүдэд тохижилт, ногоон байгууламж, цэвэрлэгээгээ сайжруулах хугацаат үүрэг өгч, хэрэгжилтийг 14 хоног тутам шалгаж тохижилтыг нь үнэлсэн наалт нааж байгаа юм.
        Эхний ээлжийн хангалттай гэсэн үнэлгээ бүхий наалтыг Хан-Уул дүүргийн 2 дугаар хорооны “Туул” сууц өмчлөгчдийн холбоо, Баянгол дүүргийн 12 дугаар хороо авчээ. Тус газрууд тохижилтоо сайжруулж өгсөн үүрэг даалгаврыг сайн биелүүлж иргэдтэйгээ хамтран ногоон байгууламжаа нэмэгдүүлэн орчноо тохижуулсан байна. Хангалттай гэсэн үнэлгээ бүхий наалт нь “Баярлалаа” гэсэн бичигтэй инээмсэглэж буй хүний дүрс байх бөгөөд тохижилт сайтай цэмцгэр байгууллага гэсэн тодотголтой аж.
      Харин Хан-Уул дүүргийн Хаан банкны Жаргалан салбар гадна орчноо цэвэрлээгүй, үүдний довжооны наалт  нь ховхорсон, байшингийн нь эргэн тойрон угаагаагүй, бэлэн мөнгөний машины гадна дотор тал үзэмжгүй, шаардлага тавьсан ажлын хэсгийнхнийг эсэргүүцэж зохисгүй авир гаргасан тул хангалтгүй үнэлгээ авсан байна. Мөн Хан - Уул дүүргийн 2 дугаар хороо “Цайны зам трейд”-ын дэлгүүр, караоке, ресторан цэвэрлэгээ муутай байсан тул хангалтгүй гэсэн үнэлгээ авчээ. Хангалтгүй үнэлгээ авсан аж ахуйн нэгжүүдэд “гахай”-ны дүрс бүхий тохижилт муутай бохир байгууллага гэсэн наалт нааж байгаа бөгөөд эдгээр  байгууллагууд орчноо цэвэрлэж гаргасан зөрчлөө арилгасан тохиолдолд  хангалттай гэсэн үнэлгээ авах боломжтой ажээ.