Барилгын материалын дотоодын үйлдвэрлэгчдийн тоог нэгээр нэмж, энэ салбарын үйлдвэрлэлд багагүй хувь нэмэр оруулах хүчин чадалтай нэгэн шинэ үйлдвэр “Ажил үйлчилгээ эрхлэх тусгай зөвшөөрөл”-өө гардан авлаа. Тусгай зөвшөөрлийг Монголын Барилгын Материал Үйлдвэрлэгчдийн холбоо гардуулсан юм.

     Төв аймгийн Сэргэлэн сумын нутгийг дайран өнгөрөх 7-р зөрлөгийг түшиглэн баригдсан БНХАУ-ын хөрөнгө оруулалттай энэхүү Цементийн үйлдвэрийг тус улсын “Мөнхийн баян гал” компани байгуулсан.

     Энэ нь барилгын материалын зах зээлд шударга өрсөлдөөнийг бий болгох, цементийн үнийг өрсөлдөхүйц тогтвортой түвшинд нь хязгаарлах, чанар стандартыг дээшлүүлэх, зардлыг бууруулах гээд олон талын ач холбогдолтой бүтээн байгуулалтын нэгд зүй ёсоор тооцогдож байгаа юм.

     7-р зөрлөгийн Цементийн үйлдвэр нь жилд 750 мянган тонн клинкер, нэг сая тонн цемент үйлдвэрлэх хүчин чадалтай. Харин Монгол орны цаг агаар, уур амьсгалаас шалтгаалан 10-р сараас хойш үйлдвэрлэл зогсонги байж, зуны цагт үйлдвэрлэл хэвийн явагдана гэж үзээпд, Монголын Цементийн дотоодын хэрэгцээ 3 сая тонн гэж тооцвол эхний жилд үүний аравны нэг хувийг нь хангах боломж байгаа гэдгийг төлөөлөгч нь мэдэгдсэн юм.

     Үйлдвэрлэж буй цементийн хувьд марк нь 425 аж. Хятад улсад энэ төрлийн цементийг нисэх буудал, гүүр, төмөр зам гэх зэрэг томоохон төсөлд хэрэглэдэг юм байна.

     Импортоор оруулж ирсэн цемент, барилгын материалын зардлын ихэнх нь тээврийн өртөг байдаг. Харин энэхүү цементийн үйлдвэрийн клинкерийн шатаалтын зуух ашиглалтанд орж, тээрмийн үйлдвэртэй нэгдэж ажилласнаар импортын цементийн үнээс хямд байх боломжтой ажээ.