Улаанбаатар хотын хэмжээнд 80 сургууль, цэцэрлэгийн барилга хэрэгтэй байгаагаас энэ онд 14 бага сургууль, цэцэрлэгийн барилгыг ашиглалтанд өгнө.

Нийслэлийн Засаг даргын Барилга угсралт, хөрөнгө оруулалт хариуцсан орлогч дарга С.Очирбат, Нийгмийн хөгжлийн асуудал хариуцсан орлогч Ц.Энхцэнгэл нар нийслэлийн төсвийн хөрөнгөөр барьж байгаа бага сургууль, цэцэрлэгийн барилгын ажлын явцтай танилцлаа. Энэ жилийн хувьд 14 сургууль, цэцэрлэгийн цогцолбор хэлбэрээр баригдаж байгаа бөгөөд өнөөдөр найман газарт нь шалгалт хийсэн юм.

Эхлээд ХУД-ийн 15 хороонд баригдаж байгаа бага сургууль, цэцэрлэгийн цогцолборын ажилтай танилцлаа. Ажил гүйцэтгэгч “Шилдээд” ХХК-ний хэлснээр, “Ажлын явц 80 хувьтай ирэх сард ашиглалтанд өгнө. Инженерийн холболт шийдэгдээгүй байгаа нь барилга дуусгахад бэрхшээлтэй байна” гэлээ.  Барилга угсралт, хөрөнгө оруулалт хариуцсан орлогч дарга Очирбат, НЗДГ-аас инженерийн хөрөнгө оруулалтын асуудлыг шийдвэрлэсэн. Хөрөнгө оруулалттай холбоотой асуудал дээр санаа зовох зүйл байхгүй, ажлаа сайн үргэлжилүүлээрэй гэж байлаа.

ХУД-ийн 14 хороо Өлзийт хорооллын бага сургууль, цэцэрлэгийн цогцолборын барилгын үйл явцтай танилцсан юм. Тус барилга дээр очиход хэд хэдэн удаа үерийн ус буусан, Өлзийт хороололд тог цахилгаан шийдэгдээгүй учраас ажлын явц бусад сургуулиа бодвол удаашралтай байлаа. Нийслэлийн Засаг даргын орлогч С.Очирбат, далан барих ажил, цахилгааны асуудлыг яаралтай шийдвэрлэж өгнө хэмээн мэдэгдлээ. Тус барилгыг энэ ондоо багтаан улсад хүлээлгэн өгөх аж. Өлзийт хорооллын тухайд ганц сургуультай бөгөөд дээрх сургууль ашиглалтанд орсноор багагүй ачаалал хөнгөлөх юм. Үүний дараа ХУД-ийн Морингийн даваа, 10 хороонд баригдаж буй цогцолбор дээр очлоо. Тус барилгын тухайд есдүгээр сарын нэгэнд ашиглалтанд өгөхөд бэлэн болжээ. Одоогоор хоёр сургуулийн ажил удааширсан, нэг нь газрын онцлогоос үүдсэн байна. Дашрамд дурьдахад, дээрх 14 цогцолбор тус бүр 300 хүүхдийн хүчин чадалтай, нэг сургуулийг 2 тэрбум гаруй төгрөгөөр барьж байна.

ХУД-ийн 15 хороонд баригдаж байгаа бага сургууль, цэцэрлэгийн цогцолбор

ХУД-ийн 14 хороо Өлзийт хорооллын бага сургууль, цэцэрлэгийн цогцолбор

ХУД-ийн Морингийн даваа, 10 хороонд баригдаж буй цогцолбор