Монгол орны бүтээн байгуулалтын хөгжилд үнэтэй хувь нэмэр оруулах өндөр хүчин чадалтай цементийн үйлдвэр үүд хаалгаа нээж байна. Хүнд үйлдвэр, уул уурхай, барилга байгууламжийн салбарт 20 гаруй жил үйл ажиллагаа явуулж буй “Монполимет” групп 2015 оны 8-р сарын 13-ны өдөр Дорноговь аймгийн Өргөн сумын нутагт орших Сэнжит Худаг шохой чулууны орд газрыг түшиглэн байгуулсан Монцемент үйлдвэрийн нээлтээ хийлээ.

     Жилд 1 сая тонн цемент үйлдвэрлэх хүчин чадалтай уг үйлдвэрийг Хөгжлийн банк болон Европын Сэргээн Босголтын банкны 250 сая ам.долларын хөрөнгө оруулалтаар байгуулж байгаа юм.

    Монцемент үйлдвэр нь Монгол Улсын болон Европын стандартын шаардлагад нийцсэн байгаль орчинд ээлтэй, эрчим хүчний хэмнэлттэй хамгийн сүүлийн үеийн технологи ашиглаж буйгаараа давуу онцлогтой.

      Мөн үйлдвэрийн хаягдал метан хийг ашиглан 5 мВт хүчдэл цахилгаан гаргах хүчин чадалтай үйлдвэрт хаягдал усыг цэвэршүүлж, 90 хувийг нь дахин ашигласнаар усыг багагүй хэмжээгээр хэмнэх боломжийг бүрдүүлжээ..

     Монцемент төслийн хүрээнд Өргөн суманд ахуйн үйлчилгээний төв, цэцэрлэг, спорт цогцолбор бүхий 280 айлын орон сууц байгуулахаар төлөвлөсөн байна.