Монголын барилгын салбарын хөгжил дэвшлийн бахархалын түүхэнд эх орондоо барилгын төрөл бүрийн мэргэжлээр үндэсний Инженер-техникийн ажилтныг дотооддоо сургаж, бэлтгэсэн амжилт чухал байр суурь эзэлдэг. Улс орны хөгжлийн үе шатанд төр засгаас барилгын салбарыг хөгжүүлэх түүнийг үндэсний боловсон хүчнээр хангах талаар авсан олон талт арга хэмжээнүүдийн нэг нь 1960 онд Барилгын техникумыг (одоогийн Барилгын Политехник Коллеж) байгуулсан явдал юм. Энэхүү 55 жилийн түүхт сургуулийн Сантехник, дулааны техникч мэргэжилтэй анхны төгсөгчид ийнхүү 50 жилийн дараа уулзлаа. Анх 1965 онд дээрх мэргэжлээр 35 боловсон хүчин Монголдоо анхдагч болон төгссөн. Тэд 50 жилийн хугацаанд Барилгын яамны томилолтоор улс орны өнцөг булан бүрт ажилласан ахмад барилгачид болсны дээр олонх нь мэргэжлээрээ дээд сургууль төгсөж, жинхэнэ онол туршлага төгс инженерүүд болцгоожээ.
        Тус ангийн анхны төгсөгч, МУ-ийн гавъяат барилгачин, МУ-ын зөвлөх инженер Д.Намсрай ярихдаа, “Бид 50 жилийн дараа уулзах үнэхээр сайхан байна. Сантехник, инженерийн хүн гэдэг бол хотын цэвэр, бохир усны болон дулааны шугамын хангамж, тогтвортой ажил, үйлчилгээ, хүний эрүүл ахуйг сахиулах буянтай сайхан үйлс юм. Тухайн үед одоогийнх шиг нарийн технологитой байгаагүй ч, гадна, дотно шугам сүлжээг үнэхээр чанартай хийж гүйцэтгэсэн нь түүхэн он жилүүд харуулж буй нь бахархалтай.”