Зуны цагт бороо хур орсон үед нийслэлд авто зам, гудамж талбай усанд автах нь ихсэж, иргэдэд багагүй хүндрэл учруулах болсон. Тиймээс хотын хэмжээнд ус зайлуулах байгууламжийн нөхцөл байдал ямар байгаа, цаашид хийхээр төлөвлөж буй засвар шинэчлэлийн талаар Улаанбаатар Хотын Захирагчийн Ажлын Албаны Инженерийн байгууламжийн хэлтсийн Ус зайлуулах барилга байгууламж хариуцсан мэргэжилтэн М.Балдандоржоос тодруулга авлаа.

Нийслэл хотын ус зайлуулах байгууламжийн хүчин чадал ямар байгаа вэ?

Улаанбаатар хотод өнөөдрийн байдлаар зам талбайн борооны ус зайлуулах чиглэлээр 85 км орчим шугам сүлжээ байдаг. 10,000 метр кубын хүчин чадалтай нэг насостой. Үерийн хамгаалалтын чиглэлээр 180 гаруй км 24 байгууламж байгаа. Ер нь нийслэл хотын ус зайлуулах байгууламжийн систем бол хүчин чадлын хувьд хэтэрсэн, ачаалал дийлэхээргүй болсон. 1960-аад онд баригдсан байгууламжууд учраас ашиглалтын хугацаа дууссан. Энэ нь хотын хүн амын нягтаршил, ногоон байгууламжийн багасалт, хотын суурьшлын бүсийн тэлэлттэй холбоотой.

Цаашдаа Улаанбаатар хотын Захирагчийн Ажлын Албанаас хотыг төвийн, зүүн, баруун гэсэн гурван бүст хувааж, насостой болохоор төлөвлөлтийг хийж байгаа.

Энэ зуны хувьд бороо хур ихтэй байгаагаас үүдээд нийслэл хотын зам талбайд ус тогтож, иргэдэд ихээхэн хүндрэл учруулж байна. Энэ тал дээр холбогдох байгууллагын зүгээс ямар арга хэмжээ авч байна вэ?

Ер нь нийслэл хотын борооны усыг зайлуулах төв экстраль шугамын өргөтгөл шинэчлэлийн ажил 1960-аад оноос хойш огт хийгдээгүй. Салбар шугамууд бол хийгдэж байгаа ч, ачааллаа дийлэхгүй байна. Борооны ус 20-30 минутын дараа шингэж алга болж байгаа. Нэмж хэлэхэд, авто замын зураг төсөл боловсруулалт дээр усны мэргэжлийн инженерийн тооцоолол муу хийгдэж байна. Түүнээс шалтгаалаад хур тунадас, нарийн тооцоолол байхгүйгээс өнөөдрийн энэ ачааллаа дийлэхгүй нөхцөл байдал үүсдэг.

Тэгвэл энэ мэргэжлийн тооцооллыг хийх, цааш нь хөгжүүлэх тал дээр арга хэмжээ авч байна уу?

2013, 2014 оноос эхлээд усны мэргэжлийн байгууллагаар нь борооны ус зайлуулах байгууламжийн зургийг хийлгэх шаардлага тавьж байна. Усны нарийн мэргэжлийн тооцоо дутагдаж байгаа учраас зураг төсөл буруу хийгдэх, дутуу гүйцэтгэх зэрэг алдаанууд гардаг. Цаашдаа Захирагчийн Ажлын Албанаас ашиглалтыг сайжруулахын тулд шаардлага тавьж, 2020 он хүртэлх Ус зайлуулах байгууламжийг сайжруулах хөтөлбөрийг гаргасан. Хөтөлбөрийг хэрэгжүүлэхэд нийт 373 тэрбум төгрөгийн хөрөнгө оруулалт шаардлагатай байгаа. Юуны түрүүнд энэ хөрөнгө оруулалтын асуудлыг шийдвэрлэх зайлшгүй шаардлагатай. Цаашид борооны ус, үерийн даланг хотын хөгжил цэцэглэлттэй уялдуулан, тохижилтыг нь хамт шийддэг байх журам хэрэгтэй.

Зураг төслийг ногоон байгууламж, зам талбай, борооны ус зайлуулах байгууламжтай нь хамтад нь шийдэхэд анхаарал хандуулах хэрэгтэй байна. Экстраль шугамуудаа шинэчлэх, томсгох зайлшгүй шаардлага тулгараад байна.

Мөн авто замын зургийн компаниудад усны чиглэлийн инженер дутагдалтай байгаа. Энэ талын тооцооллыг мэргэжлийн байгууллагаар нь хийлгэж хэвшээгүйгээс асуудал үүсдэг.